ვენეციის 81-ე კინოფესტივალზე გადაწყვეტილება შეცვალა და რუსუდან გლურჯიძის ფილმი ანტიკვარიატი ფესტივალზე დაუშვა. ფილმის პრემიერა 6 სექტემბერს გაიმართა. ამის შესახებ ინფორმაციას საქართველოს ეროვნული კინოცენტრი ავრცელებს.

საქართველოს კინემატოგრაფიის ეროვნული ცენტრის ინფორმაციით, ფილმის შემოქმედებითი გუნდისა და არაერთი მხარდამჭერის ძალისხმევის შედეგად ვენეციის ფესტივალმა შეცვალა თავდაპირველი გადაწყვეტილება ფილმის ჩვენებების გაუქმებასთან დაკავშირებით და ფილმის პრემიერა საბოლოოდ 6 სექტემბერს გაიმართა (ნაცვლად 4 სექტემბრისა).

კინოცენტრი წერს, რომ "რუსუდან გლურჯიძის 2024 წლის ნამუშევარი 2006 წელს რუსეთის ფედერაციის მხრიდან ეთნიკური ნიშნით ქართველთა მასობრივ უკანონო დეპორტაციას აღწერს. აღსანიშნავია, რომ 2014 წელს საქართველომ სტრასბურგის ადამიანების უფლებების სასამართლოში რუსეთის წინააღმდეგ მოიგო დავა და დაამტკიცა რუსეთის ბრალეულობა ქართველი მიგრანტების მიმართ. ჩამოთვლილი მიზეზების გათვალისწინებით ვენეციის კინოფესტივალზე ქართული ფილმის ჩვენების აღდგენა ისტორიულ მნიშვნელობას ატარებს და მტკიცედ იცავს საქართველოს ღირსებას საერთაშორისო ასპარეზზე".

შეგახსენებთ, რომ ვენეციის კინოფესტივალზე რუსუდან გლურჯიძის ფილის ჩვენება საავტორო უფლებებზე დავის გამო 28 აგვისტოს შეაჩერა. Variety წერდა, რომ ეს ნაბიჯი ვენეციის სასამართლოს განკარგულებას მოჰყვა, რომელიც სამმა პროდიუსერულმა კომპანია - Viva Film-მა (რუსეთში), Avantura Film-მა (ხორვატია) და Pygmalion-მა (კვიპროსი), ფილმის სცენართან დაკავშირებით საავტორო უფლებების დავის გამო, მიიღო.