პოლიტიკური პარტია გირჩი GEM Fest-ზე უცნობი ნარკოტიკული საშუალების მოხმარების შედეგად ქალის გარდაცვალების ტრაგიკული შემთხვევის გამო, პასუხისმგებლობას მთელს საზოგადოებას აკისრებს. გირჩი აცხადებს, რომ სახელმწიფოს მხრიდან აკრძალვა და მკაცრი ნარკოპოლიტიკა არის დანაშაულებრივი შეცდომა, რომელიც ვერ იცავს და პირიქით რისკის ქვეშ აყენებს მოქალაქეების სიცოცხლეს:

"მხოლოდ აკრძალვების და გაუმართლებლად დრაკონული პოლიტიკის შედეგია ის, რომ სახელმწიფოს მიერ დაფინანსებულ ელექტრონული მუსიკის ფესტივალზე ადგილი ჰქონდა გაურკვეველი შემადგენლობის და წარმომავლობის ნარკოტიკის არალეგალურად გაყიდვას და მათ მოხმარებას არაინფორმირებული მოქალაქეების მიერ. როცა ლეგალური გზებით კონვენციური ნარკოტიკი მიუწვდომელია, ბუნებრივია, რომ ხდება არალეგალური გზებით გაურკვეველი ნივთიერებების მოხმარება."

გირჩი ნარკოპოლიტიკის ლიბერალიზაციის ერთ-ერთი მთავარი ლობისტია საქართველოში. პარტია წლებია მოითხოვს სხვადასხვა ტიპის ნარკოტიკის კულტივაციის, შენახვის და მოხმარების დეკრიმინალიზაცია/ლეგალიზაციას. გირჩის მტკიცებით, ამ მოთხოვნის უკან დგას რაციონალური გათვლა და ცივილიზებული მსოფლიოს გამოცდილება, რომ ასე უკეთ დავიცავთ ჩვენს მოქალაქეებს, მათ თავისუფლებას, მათ უფლებებს, მათ ჯანმრთელობას, ავამაღლებთ ცოდნას ნარკოტიკების შესახებ, დავასრულებთ მომხმარებელთა სტიგმატიზაციას, აღმოვფხვრით ადამიანის სიცოცხლისთვის მყისიერი საფრთხის შემცველი კუსტარულად დამზადებული სინთეტიკური ნარკოტიკის უკანონო ბრუნვას, მოვახდენთ ნარკოდამოკიდებულების პრევენციას.

გირჩი მწუხარებას გამოვთქვამს ახალგაზრდა გოგოს გარდაცვალების გამო და სამძიმარს უცხადებს მის ოჯახს და ახლობლებს. პარტია მოუწოდებს ყველას, პოლიტიკური მიზანშეწონილობისა და ირაციონალური შიშების გარეშე, გაიაზრონ მიზეზ-შედეგობრივი კავშირი არსებულ საბჭოთა ტიპის, დასჯაზე ორიენტირებულ ნარკოპოლიტიკასა და გაუბედურებულ სიცოცხლეებს შორის:

"იქნებ უკანასკნელი ტრაგიკული შემთხვევა იყოს ბოლო და მოხდეს არსებული ნარკოპოლიტიკის გადახედვა და მისი კარდინალური შეცვლა ლიბერალიზაციის მიმართულებით," - აცხადებს გირჩი.