საკონსტიტუციო სასამართლოში რუსული კანონის სამდღიანი განხილვა დასრულდა. პლენუმმა უნდა დაადგინოს, მიიღებს თუ არა წარმოებაში რუსული კანონის საწინააღმდეგო სარჩელებს და დაიწყებს თუ არა არსებით განხილვებს.

როგორც სხდომის თავმჯდომარემ სხდომის დასასრულს აღნიშნა, მხარეებს ინფორმაცია — სასამართლო აქტის მიღების შესახებ დამატებით ეცნობებათ.

“განმწესრიგებელი სხდომა სარჩელებზე დამთავრებულია. სასამართლო აქტის მიღების შესახებ მხარეებს ეცნობება დამატებით“, — განაცხადა მერაბ ტურავამ.

შეგახსენებთ, რომ საქართველოს პრეზიდენტის, 122 მოსარჩელის, საქართველოს პარლამენტის წევრების, საინფორმაციო ცენტრების ქსელის და სტუდია მონიტორის სარჩელის განხილვა საქართველოს პარლამენტის წინააღმდეგ 29 აგვისტოს დაიწყო.

საკონსტიტუციო სასამართლოში რუსული კანონის საკონსტიტუციო სარჩელის განხილვისას პრეზიდენტის წარმომადგენლები ეკა ბესელია, კახი სამხარაძე, ზურაბ მაჭარაძე და გიორგი ბურჯანაძე იყვნენ.

ქართული ოცნების დეპუტატები, ანრი ოხანაშვილი, თენგიზ შარმანაშვილი და არჩილ გორდულაძე საკონსტიტუციო სასამართლოში რუსული კანონის განხილვას არ ესწრებოდნენ. მათ ნაცვლად საკანონმდებლო ორგანოს პარლამენტის აპარატის თანამშრომლები: ლევან კასრაძე, ლევან ღავთაძე და ქრისტინე კუპრავა წარმოადგენდნენ.

სხდომას ასევე არ ესწრებოდა მოსამართლე ირინე იმერლიშვილი. მიზეზად სხდომის თავმჯდომარემ, მერაბ ტურავამ მისი ჯანმრთელობის მდგომარეობა დაასახელა.