შერიგებისა და სამოქალაქო თანასწორობის საკითხებში საქართველოს სახელმწიფო მინისტრმა ქეთევან ციხელაშვილმა მთავრობის სხდომაზე განაცხადა, რომ ოკუპანტები საზღვრის უკანონოდ გადმოწევას სოფელ არცევში ცეცხლის საწინააღმდეგო თხრილების გავლებით აპირებენ:

"სოფელ არცევში დაანონსებულია ხნულების გავლება. იგი ერთ-ერთი ფორმაა ბარიკადებით საოკუპაციო ხაზის შემოფარგვლისა. ამ ე.წ. ბორდერიზაციას სხვადასხვა ფაზები და ფორმები ჰქონდა. ზოგ შემთხვევაში ეს იყო ბარიკადები, მავთულხლართები, მიწათხრილები, ბანერები და ამ შემთხვევაში ეს გახლავთ თხრილები. დეკლარირებულად ესაა ცეცხლის საწინააღმდეგო თხრილები, მაგრამ ბუნებრივია ეს უკავშირდება ე.წ. ბორდერიზაციის მცდელობას და საოკუპაციო ხაზის შემოფარგვლის პროცესს. ჩვენი მიდგომაა, რომ სრული საერთაშორისო მხარდაჭერის მობილიზება მოვახდინოთ, რათა ეს პროცესი შევაჩეროთ".

ქეთევან ციხელაშვილის თქმით, მათი მიდგომაა, დაეხმარონ გამყოფი ხაზის მიმდებარედ მცხოვრებ მოსახლეობას, ცხოვრების მძიმე პირობების გასაუმჯობესებლად. მისივე თქმით, ეს ყველაფერი მავთულხლართების ორივე მხარეს მოსახლეობას ძალიან მძიმე ცხოვრების პირობებს უქმნის:

"სწორედ არცევის მონაკვეთზე, სადაც საუბარია მიწათხრილების გავლებაზე, მავთულხლართებს იქეთ მცხოვრებმა მოსახლეობამ მოითხოვა გადაადგილების თავისუფლების უზრუნველყოფა საქართველოს მიერ კონტროლირებად ტერიტორიაზე".