ბექა ოდიშარია ამბობს, რომ მისი განცხადება TV პირველმა დამახინჯებული ფორმით, პირადი წყენის საფუძველზე გაავრცელა.

ოდიშარიამ, პრეზიდენტ სალომე ზურაბიშვილის გამოხმაურებაც შეაფასა, როგორც "უტაქტო" და "უადგილო".

"მატყუარას და ცილისმწამებლის იარლიყი კი ადამიანს დიდხანს მიყვება ცხოვრებაში" — თქვა, ბექა ოდიშარიამ.

21 აგვისტოს ცნობილი გახდა რუსეთის მიერ ოკუპირებულ აფხაზეთში დაკავებული ორი ქართველი მოქალაქის შესახებ. აღნიშნულ ფაქტთან დაკავშირებით მალევე გავრცელდა ქართული ოცნების დეპუტატის ბექა ოდიშარიას კომენტარიც, სადაც მან დაკავებული "გარკვეულწილად" დაადანაშაულა:

"ამ შემთხვევაში, თუ ადამიანი დაკავებული იყო ფულის აღებ-მიცემობით იმისთვის, რომ ადამიანებს გადაეკვეთათ ეს ხელოვნური ადმინისტრაციული საოკუპაციო საზღვარი, ბუნებრივია, ამ ადამიანსაც, სამწუხაროდ, ხელი შეუწყვია იმისთვის, რომ ის დაეკავებინათ. თუმცა, კიდევ ერთხელ ვამბობ, მან უნდა აგოს პასუხი არა აფხაზეთის მარიონეტული ხელისუფლების წინაშე, ან რუსული საოკუპაციო ჯარის წინაშე, არამედ ის უნდა დაუყოვნებლივ გადმოცემული იყოს საქართველოსთვის, საქართველოს ლეგიტიმური ხელისუფლებისთვის, რომელიც, ვფიქრობ, გაერკვევა საკითხში." — თქვა ჟურნალისტთან ბექა ოდიშარიამ