სომხეთში, საბაჟოს თანამშრომლებმა, ბრაზილიელ ტურისტზე ზეწოლა მოახდინეს, რომ ალკოჰოლური სასმელი პირდაპირ ბოთლიდან დაელია, რის შემდეგაც ის საავადმყოფოსკენ მიმავალ გზაზე გარდაიცვალა.

ტაბლოიდი მედიის ცნობით, ფაქტი 8 აგვისტოს მოხდა. სომხეთის საბაჟოს თანამშრომლებმა ბრაზილიელ მოქალაქეს პირდაპირ ბოთლიდან, ძალდატანებით დაალევინეს ალკოჰოლური სასმელი, რამაც მისი სიკვდილი გამოიწვია.

"ბოთლის ეტიკეტის წაკითხვის ნაცვლად, საბაჟოს თანამშრომლებმა დააძალეს ბრაზილიის მოქალაქეს, რომ დაელია სასმელი, რის შემდეგაც ის შეუძლოდ გახდა და რამდენიმე წუთში გარდაიცვალა", — წერს მედია.

რუსტამ ბადასიანმა, სომხეთის სახელმწიფო შემოსავლების კომიტეტის თავმჯდომარემ, უარყო, რომ საბაჟოს ოფიცერმა 30 წლის ბრაზილიის მოქალაქეს, არაუჯოლიმა ლუკასს, მისთვის საბედისწერო საეჭვო ნივთიერების დალევა დააძალა.

"უბრალოდ წარმოიდგინეთ საბაჟოს ოფიცერი, რომელიც არის ჩვენი თანამემამულე, აძალებს მოქალაქეს ნარკოტიკის დალევას. უბრალოდ წარმოიდგინეთ სცენა: საბაჟოს ოფიცერმა გააღებინა მოქალაქეს პირი?", — განაცხადა ბადასიანმა.

მან ასევე დასძინა, რომ საქმეზე გამოძიება დაწყებულია საგამოძიებო კომიტეტის მიერ და თუ ვინმე მოიქცა "არაპროფესიულად" მას აუცილებლად დააკავებდნენ.

ბადასიანის თქმით, ინციდენტი კამერებმა გადაიღეს, ჩანაწერს კი ჯერ კიდევ იკვლევენ. მან ჟურნალისტებთან განაცხადა რომ ნახა ვიდეოები და იმის მიუხედავად რომ ყველაფერი კარგად არ ჩანდა, პროცესი მაინც თვალსაჩინო იყო.

"შემდეგი რამ მოხდა: პიროვნებამ [ბრაზილიელმა], დიდი ალბათობით, ნარკოტიკები გადმოიტანა. ჩვენმა რისკის სისტემამ გადაწყვიტა, რომ ის უნდა დაჰქვემდებარებოდა შემოწმებას. შემოწმების დროს, მოქალაქეს ბოთლი ამოუღეს და სავარაუდოდ, ეჭვების გასაფანტად, მას ბოთლიდან დალევა სთხოვეს. რა თქმა უნდა, ეს არ არის ნორმალური პროცედურა", — თქვა ბადასიანმა.

სომხეთის საგამოძიებო კომიტეტმა მკვლელობის საქმეზე დაიწყო გამოძიება, ხოლო ბრაზილიის მოქალაქის მიერ მიღებულ ნივთიერებაზე სასამართლო ექსპერტიზა ტარდება.

OC Media-მ, კომენტარის მისაღებად სომხეთში არსებულ ბრაზილიის საელჩოსთან დაკავშირება ვერ შეძლო.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.