ევროპაში მაიმუნის ყვავილის პირველი შემთხვევა დადასტურდა, ვირუსი შვედეთში დაფიქსირდა. ეს პირველი პრეცედენტია, როდესაც ეს კონკრეტული შტამი აფრიკის კონტინენტს გასცდა

არის თუ არა, საქართველოში მაიმუნის ყვავილის გავრცელების საფრთხე, ამ თემაზე NEWS.On.ge მედიცინის მეცნიერებათა დოქტორს, იაშვილის ბავშვთა ცენტრალური საავადმყოფოს სამედიცინო დირექტორ, ივანე ჩხაიძეს ესაუბრა.

ჩხაიძემ განმარტა, რომ მაიმუნის ყვავილის, იგივე მპოქსის გავრცელების სპეციფიკურობიდან გამომდინარე, ქვეყანა ახალი პანდემიის საშიშროების წინაშე არ დგას.

"მაიმუნის ყვავილი, ძალიან სპეციფიკური ვირუსია გავრცელების თვალსაზრისით, გავრცელებაში ვგულისხმობ გადადებას, როგორ გადაედება ინფიცირებული ადამიანიდან ჯანმრთელ ადამიანს.

ეს არ არის კორონავირუსი ან რაიმე გრიპი, რომ გავრცელდეს ჰაერწვეთოვანი გზით. მაიმუნის ყვავილი გავრცელებისთვის საჭიროებს ძალიან ახლო კონტაქტს — კანის კანთან კონტაქტს. ბევრი შემთხვევა სქესობრივი გზით კონტაქტის შემდეგ არის დაფიქსირებული.

ჯერჯერობით, შემთხვევები არის დაფიქსირებული აფრიკის კონტინენტზე, ევროპაში გვაქვს მხოლოდ ერთი შემთხვევა, საქართველოშიც შეიძლება დაფიქსირდეს ერთეული შემთხვევები, თუმცა იმის საშიშროება, რომ გამოიწვიოს ეპიდაფეთქება არ გვაქვს", — გვითხრა ივანე ჩხაიძემ.

შეგახსენებთ, გუშინ შვედეთში მაიმუნის ყვავილის პირველი შემთხვევა გამოვლინდა. მანამდე ჯანმრთელობის მსოფლიო ორგანიზაციამ, მპოქსის გავრცელების გამო მსოფლიოში საგანგებო მდგომარეობა გამოაცხადა.

WHO-ს მიხედვით, მპოქსი, იგივე მაიმუნის ყვავილი, ვირუსული დაავადებაა, რომელიც ადამიანებსა და ცხოველებში მარტივად ვრცელდება. ეს შეიძლება მოხდეს როგორც შეხებით, კოცნითა თუ სქესობრივი კონტაქტით, ასევე ვირუსით დაბინძურებული საგნებიდანაც (თეთრეული, ტანისამოსი, ნემსები და ა. შ.). დაავადება არაერთი სიმპტომით ვლინდება, რომელთა შორისაა:

  • მაღალი ტემპერატურა;
  • მტკივნეული გამონაყარი;
  • კუნთების, ზურგისა და თავის ტკივილი;
  • სისუსტე;
  • ლიმფური კვანძების გადიდება.

ათწლეულების განმავლობაში დაავადება მხოლოდ ცენტრალურ და დასავლეთ აფრიკაში გვხვდებოდა, თუმცა 2022 წელს მისი გავრცელება ევროპასა და ჩრდილოეთ ამერიკაშიც დაიწყო. WHO-მ მპოქსის გამო საგანგებო მდგომარეობა 2022 წლის ივლისშიც გამოაცხადა და ეს პერიოდი 2023 წლის მაისში დასრულდა.

WHO-ს წარმომადგენლებმა წარსულში განაცხადეს, რომ ვირუსის გავრცელების შეჩერება შესაძლებელია ზუსტი, მიზანმიმართული მოქმედებებით. ორგანიზაცია ამჟამად საერთაშორისო ჩართულობას მოითხოვს, სწორედ ამას ნიშნავს WHO-ს მხრიდან გამოცხადებული საგანგებო მდგომარეობა.