თბილისის მერის, კახა კალაძის განცხადებით, გლდანის დიდი ტბის ეკოლოგიური პრობლემის გადაჭრისთვის, მისი მოცულობის საჭირო ნიშნულამდე გაზრდა დაიგეგმა.

"ტბას, წლების განმავლობაში, ყურადღება არ ექცეოდა, პრობლემა გახდა მისი წყლით შევსება, რის გამოც, მან დაიწყო დაშრობა. პრობლემის გამომწვევი მიზეზების შესწავლის შედეგად, ტბის შევსება/გაჯანსაღებისთვის მისი მოცულობის საჭირო ნიშნულამდე გაზრდა დაიგეგმა", — განაცხადა მერმა დღეს, 17 ივლისს, თბილისის მთავრობის სხდომაზე.

კალაძის თქმით, ტბის მოცულობის გაზრდა ჯორჯიან უოთერ ენდ ფაუერის ბალანსზე არსებული ბოდორნა-ღრმაღელის წყალგამტარი გვირაბის მეშვეობით განხორციელდება.

ასევე, გარემოს დაცვის საქალაქო სამსახურმა შემავსებელი სისტემის მოწყობა დაიწყო, რომელიც უნდა დაერთდეს ბოდორნა-ღრმაღელის წყალგამტარ გვირაბზე. აღნიშნული სამუშაო მიმდინარე წლის აგვისტოს ბოლოს დასრულდება:

"გლდანის დიდი ტბა შეივსება მიმდებარე ფერდობებზე წარმოქმნილი ატმოსფერული ბუნებრივი წყლებით, რომელიც სანიაღვრე კოლექტორის მეშვებით ჩაეშვება ტბაში. რაც ყველაზე მნიშვნელოვანია, ზემოაღნიშნული ღონისძიებების დახმარებით, შევინარჩუნებთ და გადავარჩენთ გლდანის თეთრ ტბას", — თქვა მერმა.