რატომ მოჰყვა ცუდი გამოხმაურება გლადიატორი 2-ის ტრეილერს
![](http://ross.on.ge/2024/07/15/1721059409.jpg)
ფოტო: Paramount Pictures
უთუოდ გაიგებდი, რომ ოსკაროსანი ფილმი გლადიატორი გამოსვლიდან 24 წლის შემდეგ გაგრძელებით ბრუნდება. ამხელა პაუზის მიუხედავად, რიდლი სკოტის გახმაურებული ნამუშევრისადმი მაყურებლის ინტერესი, როგორც ჩანს, არ განელებულა და მეტიც, ახალი თაობა განსაკუთრებული მღელვარებით ელოდება ეპიკური ისტორიის მეორე ნაწილს, რომელიც ნოემბერში გამოდის.
სულ რამდენიმე დღის წინ გავრცელდა გლადიატორი 2-ის ტრეილერი, რომელმაც ყველა პლატფორმაზე ჯამურად 215 მილიონამდე ნახვა დააგროვა. ფილმში მთავარ როლს, ლუციუსს, პოლ მესკალი ასახიერებს. კინოსურათში ასევე მონაწილეობენ პედრო პასკალი და დენზელ ვაშინგტონი.
ტრეილერმა ინტერნეტმომხმარებლებში არაერთგვაროვანი გამოხმაურება გამოიწვია. როგორც აღმოჩნდა, მისით უფრო მეტია უკმაყოფილო, ვიდრე — კმაყოფილი. მაგალითისთვის, იუთუბზე ვიდეოს 150 ათასი მოწონების საპირწონედ 353 ათასი არმოწონება აქვს.
რატომ არის ტრეილერის შეფასების 70 პროცენტი ნეგატიური?
გამოცემა The Hollywood Reporter იუთუბის კომენტარებისა და X-ის (ყოფილი ტვიტერის) პოსტების ანალიზის შემდეგ წერს, რომ ცუდი გამოხმაურება სამ ძირითად მიზეზს ეფუძნება.
პირველი ისაა, რომ 3-წუთიანი ტრეილერი მეტისმეტად ბევრ დეტალს ამხელს ფილმზე, ეს კი, რასაკვირველია, მაყურებლის მოლოდინსა და განწყობაზე მაინცდამაინც კარგად არ მოქმედებს. სხვათა შორის, კინოსტუდია Paramount-ის შარშანდელი ფილმის, Mission: Impossible — Dead Reckoning, ტრეილერი რომ გამოვიდა, ზუსტად იმავე მიზეზით მოჰყვა მასაც ცუდი კომენტარები.
მეორე მიზეზი, რომელზეც, THR-ის ცნობით, ყველაზე ხშირად ამახვილებენ ყურადღებას, საუნდტრეკია: ტრეილერში კანიე ვესტისა და Jay-Z-ის 2012 წელს გამოსული სიმღერა No Church in the Wild ისმის. "რა ესაქმება რეპს რომის იმპერიაზე გადაღებულ ფილმში?", — კითხულობს ზოგი. თანამედროვე მუსიკა, მით უფრო რეპი, შესაძლოა, ეპიკური ისტორიული დრამისთვის შეუფერებლად ჟღერდეს. თუმცა, შეიძლება ეს სიმღერა მხოლოდ საუნდტრეკს ადევს ფონად და ფილმში ის საერთოდ არ გამოიყენონ.
საქმე ისაა, რომ გლადიატორის საუნდტრეკის კომპოზიტორმა, ჰანს ციმერმა, გაგრძელებისთვის მუსიკის დაწერაზე უარი თქვა. მე ჩემი საქმე უკვე გავაკეთე და, ვფიქრობ, კარგადაცო, განაცხადა მან; "ახლა შეიძლება ან იგივე გავიმეორო (რაც არ მინდა), ან კრიტიკოსებმა მიწასთან გამასწორონ, წინანდელივით კარგი არ გამოგივიდაო".
გლადიატორი 2-ის ტრეილერს კი ნამდვილად არ მოჰკლებია კრიტიკა და, კვლავაც THR-ის მიხედვით, ამის მესამე მიზეზი ფილმში მონაწილე მსახიობი დენზელ ვაშინგტონია, რომელიც გლადიატორების სასტიკ მფლობელად გვევლინება. გამოცემის ცნობით, კრიტიკოსების ნაწილი ვაშინგტონის ნიუიორკული აქცენტითაა უკმაყოფილო, ნაწილს კი რასისტული მოტივი აქვს. სტატიის ავტორი ამატებს, რომ ძველ რომში შავკანიანი ადამიანები ცხოვრობდნენ და ზოგიერთი ძალაუფლებასაც ფლობდა.
![](http://phoebe.on.ge/2024/07/15/3434343222.jpg)
ფოტო: Paramount Pictures
გლადიატორი 2-ში მოქმედება მისი წინამორბედის სიუჟეტიდან წლების შემდეგ ვითარდება, როცა ლუციუსი ჩრდილოეთ აფრიკაში, ნუმიდიის მხარეში ცხოვრობს. იგი აქ ჯერ კიდევ ბავშვობაში ჩაიყვანეს დედამისის, ლუცილას, ბრძანებით. თუმცა, ახალ ფილმში ლუციუსი რომს უკვე გლადიატორად უბრუნდება და დედამისსაც კვლავ ხვდება.
ისტორიული დრამის დიდოსტატი, რიდლი სკოტი, ყოველთვის ამბობდა, რომ გლადიატორს გასაგრძელებლად დაუბრუნდებოდა. მით უფრო, რომ ფილმი გამორჩეულად წარმატებული გახდა, როგორც კომერციულად, ასევე კრიტიკოსებისა და მაყურებლის აღიარებით. 2001 წლის ოსკარზე გლადიატორმა ხუთ ნომინაციაში გაიმარჯვა, მათ შორის, საუკეთესო ფილმისა და მთავარი როლის შემსრულებელი საუკეთესო მსახიობი კაცის კატეგორიებში. ამასთან, ფილმმა მსოფლიოში $460 მილიონზე მეტი გამოიმუშავა.
რაც შეეხება გლადიატორი 2-ს, მისი პრემიერა აშშ-ში 22 ნოემბერსაა დაგეგმილი.
თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
-
გადახედვა
-
გადახედვა
-
გადახედვა
-
გადახედვა
-
გადახედვა
-
კომენტარები