იორკშირის ჭაობებს კიდევ ერთხელ დავუბრუნდებით — ლეგენდარულ ქარიშხლიან უღელტეხილს ემერალდ ფენელი ისევ გააცოცხლებს დიდ ეკრანზე. ინგლისელმა რეჟისორმა და მწერალმა, რომლის სახელსაც გასული წლის გახმაურებული ფილმი Saltburn უკავშირდება, თავისი მომავალი პროექტის შესახებ სოციალური ქსელით გვაცნობა.

ფენელმა X-ზე (ყოფილ ტვიტერზე) ქარიშხლიანი უღელტეხილის ილუსტრაცია გამოაქვეყნა, რომელსაც წიგნიდან ფრაზაც ერთვის: "სულ ჩემთან იყავი, ნებისმიერი სახით, ჭკუიდან შემშალე"; სურათის ქვემოთ კი მინაწერია — "ემერალდ ფენელის ფილმი". რეჟისორმა თავისი პროფილის აღწერაშიც "ქარიშხლიანი უღელტეხილი" ჩაიწერა.

ემილი ბრონტეს გოთიკური რომანი ქარიშხლიანი უღელტეხილი მრავალჯერ გადაიღეს ფილმად და სერიალად. მათგან ალბათ ყველაზე ცნობილი 1939 წლის ეკრანიზაციაა, სადაც მთავარი როლები ლორენს ოლივიემ და მერლ ობერონმა შეასრულეს. დიდი პოპულარობით სარგებლობს 2009 წელს გამოსული სატელევიზიო ფილმიც, რომელშიც ტომ ჰარდი და შარლოტ რაილი მონაწილეობენ.

"ყოველთვის შეპყრობილი ვიყავი გოთიკით", — აღნიშნავს LA Times-ისთვის დაწერილ ბლოგში ფენელი, რომლის წინა ფილმიც, Saltburn, ასევე მოიცავს გოთიკურ ელემენტებს, — "ამ ჟანრში კომედია და ჰორორი, ზიზღი და ვნება, სექსი და სიკვდილი ყოველთვის გადახლართულია".

ქარიშხლიანი უღელტეხილი ემილი ბრონტეს ერთადერთი რომანია, რომელიც მწერალმა, თავისი დების მსგავსად, კაცის სახელით, ელის ბელის ფსევდონიმით გამოსცა 1847 წელს. რადგან ემილი მომდევნო წელს გარდაიცვალა, ნაწარმოების მეორე გამოცემის რედაქტორობა შარლოტ ბრონტემ, ჯეინ ეარის ავტორმა, ითავა.

საუკუნე-ნახევარზე მეტი გავიდა ქარიშხლიანი უღელტეხილის გამოცემიდან, მაგრამ უკვე კლასიკად ქცეული ეს ნაწარმოები ყოველთვის ხვდება საუკეთესო ინგლისურენოვან რომანებს შორის. წიგნი არაერთი თანამედროვე ხელოვანისთვისაც ქცეულა შთაგონების წყაროდ, მათ შორისაა ინგლისელი მუსიკოსი კეიტ ბუში, რომელმაც ამავე სახელწოდების ცნობილი სიმღერა დაწერა.

ასევე იხილეთ:

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...