"ეს პასუხია ამ ხელისუფლების ანტიევროპულ და ანტიდასავლურ რიტორიკასა და ქმედებებზე", — ასე გამოეხმაურა საქართველოს პრეზიდენტი, სალომე ზურაბიშვილი აშშ-ის მიერ სამხედრო წვრთნების, "ღირსეული პარტნიორის" შეჩერებას და ევროკავშირის ელჩის განცხადებას, რომლის მიხედვით, ევროკავშირმა საქართველოს თავდაცვის სფეროსთვის გამოყოფილი 30 მილიონი ევროს დახმარება გაყინა.

მსგავსი: ევროკავშირმა გაყინა 30 მლნ ევროს დახმარება, რომელიც საქართველოს თავდაცვის სფეროსთვის იყო გამოყოფილი

პრეზიდენტის თქმით, ეს "ძალიან მძიმე გზავნილები" ამერიკისა და ევროკავშირისგან პასუხია იმაზე, რომ ყველა მათი რჩევა თუ გაფრთხილებები რეაგირების გარეშე დარჩა: "თუნდაც, სიმბოლურად, იმ ერთი, არაფრისთვის და არავისთვის საჭირო რუსული კანონის უკან გაწევა ან გაყინვაზე".

ევროკავშირის ელჩმა პაველ ჰერჩინსკიმ განაცხადა, რომ ევროკავშირმა საქართველოს თავდაცვის სფეროს მხარდასაჭერად გამოყოფილი 30 მილიონი ევრო გაყინა. მისივე თქმით, საქართველოს ევროკავშირში გაწევრიანების პროცესი ამჟამად გაჩერებულია.

ასევე, 5 ივლისს ცნობილი გახდა, რომ აშშ-მა, განუსაზღვრელი დროით გადადო საქართველოსთან ერთად დაგეგმილი სამხედრო წვრთნები, "ღირსეული პარტნიორი".