სომხეთის დედაქალაქში, გასულ კვირას რვა ადამიანი, მათ შორის — ერევნის არაბკირის მუნიციპალიტეტის ადმინისტრაციის ხელმძღვანელი დააკავეს.

ეროვნული ანტიკორუფციული სასამართლოს სპიკერმა დაუდასტურა CivilNet-ს, რომ დაკავებულთა შორის არიან არაბკირის ადმინისტრაციული ოლქის ხელმძღვანელი არამ აზატიანი და მისი ორი მოადგილე. გავრცელებული ინფორმაციით, აზატიანი ორთვიანი შინაპატიმრობის პირობით გაათავისუფლეს, 30 მილიონი დრამის ($77,000) გირაოს სანაცვლოდ.

საგამოძიებო კომიტეტის ინფორმაციით, დაკავებულებს ბრალად ედებათ სამსახურებრივი უფლებამოსილების გადამეტება, ქრთამის აღება და კორუფციაში შუამავლობა.

ადგილობრივი მედიის ცნობით, რეიდის შედეგად დააკავეს მუნიციპალიტეტის კიდევ ხუთი თანამშრომელი და სხვა მოქალაქეები.

თაღლითობაში ბრალდებული ჰაიკ გალოიანის ადვოკატმა, ალექსანდრე კოჩუბაევმა ბრალდებებს "სრულიად შეთითხნილი" უწოდა.

მან რადიო თავისუფლებას განუცხადა, რომ გალოიანის კომპანიამ გამგეობასთან გააფორმა ხელშეკრულება, ადმინისტრაციული შენობების ვერანდების შეკეთების თაობაზე. მის კომპანიას ბრალად ედება სამუშაოების არასწორად დასრულება და სახელმწიფოს კუთვნილი 20 მილიონის (52 000 აშშ დოლარი) მითვისება.

კოჩუბაევის თქმით, კონტრაქტები 2021 წელს გაფორმდა და სამუშაოები მოიცავს 1 წლიან საგარანტიო ვადას.

"თუ სამუშაოები შესრულებულია და ისინი მიღებულია ჩაბარება-მიღების აქტით, თქვენ არ შეგიძლიათ ბოროტად გამოიყენოთ თქვენი უფლებამოსილება, ან გაფლანგოთ ფული“, — თქვა მან. "თუ ეს ჩაიდინეს მოქალაქეებმა, ამ შემთხვევაში, არ შეიძლება ოფიციალური პირებისა და დეველოპერების დადანაშაულება“, — დასძინა მან.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.