საქართველოს თავდაცვის სამინისტროს ინფორმაციით, ბოლნისში მომხდარი ავიაკატასტროფის საქმეზე, რომელსაც ერთი ადამიანი ემსხვერპლა, საქმე აღიძრა 401-ე მუხლით, რომელიც სამხედრო-საჰაერო ხომალდის ფრენისას უსაფრთხოების წესების დარღვევას გულისხმობს.

სამინისტროს ცნობით, გამოძიებას სამხედრო პოლიცია აწარმოებს. ამ ეტაპზე, საფრენი აპარატის ნაწილებია იდენტიფიცირებულია და ნაპოვნია შავი ყუთი. დაღუპული მფრინავის ცხედარი კი გადასვენებულია პროზექტურაში.

"წინასწარი მოკვლევით, საფრენი აპარატი გაფრენამდე სრულად იყო შემოწმებული ტექნიკური დოკუმენტაციის მოთხოვნათა შესაბამისად. ასევე ჩატარებული იყო წინასაფრენოსნო მომზადება და დაცული იყო რეგლამენტით გათვალისწინებული ყველა პროცედურა", — წერს თავდაცვის სამინისტრო.

გუშინ, 2 ივლისს, ბოლნისის მუნიციპალიტეტში, სოფელ დისველში, ვერტმფრენი ჩამოვარდა, შედეგად, დაიღუპა თავდაცვის ძალების ავიაციისა და საჰაერო სარდლობის პილოტი, კახაბერ ზურაბაშვილი.

თავდაცვის სამინისტროს ინფორმაციით, ვერტმფრენი, რომელიც ბოლნისში ჩამოვარდა, გეგმურ სამხედრო სწავლებაში იყო ჩართული.