ფეხბურთელების შეფასებისას, შესაძლოა, ჩაცმის სტილი ის კრიტერიუმი არ არის, რომელსაც ბევრი ადამიანი აქცევს ყურადღებას, თუმცა, ფაქტია, რომ მოდა და ფეხბურთი ერთმანეთთან უკვე დიდი ხანია, გადაჯაჭვულია. დახვეწილი ქუჩის სტილი, წითელ ხალიჩებზე ჩაცმული გამორჩეული ლუქები, მოდის სახლებთან კოლაბორაციები — ფაქტია, რომ ფეხბურთელებმა მოდის სამყაროში შეაბიჯეს და ზოგიერთ მათგანს მოდის ნამდვილი ენთუზიასტის რეპუტაციაც აქვს.

წარმოგიდგენთ ჩვენს რჩეულ 5 ფეხბურთელს, რომელიც საკუთარი სტილით გამოირჩევა:

1. დევიდ ბექჰემი

ფეხბურთელების სტილზე საუბრისას პირველად აუცილებლად ბექჰემი და მისი შეუდარებელი გემოვნება უნდა ვახსენოთ. 90-იანებსა და 2000-იანებში მანჩესტერ იუნაიტედის, შემდეგ კი რეალ მადრიდის ფეხბურთელი ცნობადობის . სპორტში გამოვლენილი ოსტატობის გარდა, ბექჰემის და მისი მეუღლის, ვიქტორიას სტილი პაპარაცების ყურადღებას მუდამ იპყრობდა. ბექჰემი იმ დროისთვის არსებულ მამაკაცის სტილის სტერეოტიპებს მუდამ ამსხვრევდა. მისი ჩაცმულობა 2024 წელსაც რელევანტურია და შთაგონების წყაროა მოდის მოყვარულებისათვის.

2. რონალდინიო

ბრაზილიელ მაესტროს არამხოლოდ ფეხბურთის, არამედ ჩაცმის სტილის უნიკალური შეგრძნებაც გამოარჩევს სხვებისგან. მოედნის მიღმა რონალდინიო აქსესუარების სიყვარულით, მსუბუქად ჩაცმითა და ფერადი ტანსაცმლით გამოირჩევა, რაც მის სტილს დაუვიწყარს ხდის.

3. ჟიულ კუნდე

საფეხბურთო კლუბ ბარსელონას ახალგაზრდა ფეხბურთელმა მოდის სამყაროში უკვე დაიმკვიდრა ინდივიდუალური პერსპექტივის მქონე "ფეშენისტას" სახელი. კუნდე როგორც არქივული, ასევე თანამედროვე მოდის მოყვარულია და მის სტილში ხშირად ვხედავთ ამ ორი კონცეფციის შერწყმას.

4. დიეგო მარადონა

ფეხბურთის მეფედ აღიარებულ არგენტინელ სპორტსმენს სტილის საოცარი აღქმა ჰქონდა. პომპეზურობა, ტექსტურები, პატერნები — მისი პირადი სტილი ამ სამი სიტყვით შეგვიძლია დავახასიათოთ. მაშინაც კი, როცა შედარებით სადად ეცვა და საზოგადოებისგან გამორჩევას არ ცდილობდა, დიეგო მარადონა საყურეებით, ჩე გევარას ტატუთი და ვარცხნილობით მუდამ მარტივად შესამჩნევი იყო.

5. საბა ლობჟანიძე

ჩაცმის დახვეწილი სტილით გამორჩეული ფეხბურთელებით საქართველო ყოველთვის განებივრებული იყო. საქართველოს ნაკრებისა და ამერიკული საფეხბურთო კლუბის, ატლანტა იუნაიტედის ფეხბურთელის, საბა ლობჟანიძეს სტილი ზედმიწევნით გვიჩვენებს, თუ როგორ შეიძლება გეცვას კომფორტულად და, ამავე დროს, ეფექტურად. თავისუფალი, ესთეტიკური ჩაცმულობით დღეს ის ერთ-ერთ ყველაზე გემოვნებიან ფეხბურთელად შეგვიძლია მივიჩნიოთ.