OC Media-ს ინფორმაციით, აზერბაიჯანში, პოლიციის განყოფილებაში გარდაიცვალა კაცი, რომელიც დააკავეს და ორ ძმასთან ერთად სცემეს. ერთ-ერთი ძმა შშმ პირია.

აზერბაიჯანელი თურხან ისგანდაროვმა, ბაქოს ჩრდილო-დასავლეთით მდებარე ქალაქ სუმგაიტიდან, უთხრა OC Media-ს, რომ მის ძმას, ელვინ ისგანდაროვს პოლიციამ სასიკვდილოდ 14 ივნისს სცემა.

მისი თქმით ელვინ ისგანდაროვი პოლიციამ გვიან საღამოს დააკავა — მას შემდეგ, რაც სამართალდამცველებმა სცადეს შეეჩერებინათ კამათი ელვინსა და მის ძმას, ჯაბრაილს შორის, რომელიც შეზღუდული შესაძლებლობებისაა.

თურხანის თქმით, ჯაბრაილმა სთხოვა პოლიციას, არ ჩარეულიყვნენ კამათში, თუმცა ამის შემდეგ სამართალდამცველები მას თავს დაესხნენ. ელვინმა მოუწოდა მათ შეჩერებულიყვნენ და უთხრა, რომ მისი ძმა შშმ პირი იყო.

სამართალდამცველებს ჯაბრაილის შეზღუდული შესაძლებლობების შესახებ ეუბნებოდნენ სხვა ადამიანები, რომლებიც მომხდარს შეესწრნენ, ისინი უხსნიდნენ სამართალდამცველებს, რომ კაცს "სიტუაციის რეალურად გააზრება" არ შეეძლო.

"მათ ერთ-ერთი ქალი მიწაზე დააგდეს და მის წინააღმდეგ [წიწაკის] სპრეი გამოიყენეს“, — განუცხადა თურხანმა OC Media-ს.

მისივე თქმით, სცადა დაპირისპირებაში ჩარეულიყო, თუმცა ამის შემდეგ პოლიციამ მასაც სცემა.

"ცემის შემდეგ წაგვიყვანეს პოლიციის განყოფილებაში, სადაც სამართალდამცველებმა კვლავ გვცემეს", — თქვა მან.

ელვინმა უყვირა პოლიციელებს, რომ შეეწყვიტათ თურხანის ცემა, რადგან ის ავად იყო, რის შემდეგაც პოლიციელმა ელვინს ხელკეტი დაარტყა თავის არეში.

ძმები, მოგვიანებით გაათავისუფლეს, თუმცა თურხანის მონაყოლისა და პოლიციის სათვალთვალო კამერების კადრების მიხედვით, ელვინი, პოლიციის განყოფილებიდან გამოსვლისთანავე, კართან უგონოდ დაეცა.

ადგილზე მივიდა მათი ბიძა, რომელსაც ელვინი მიწაზე დახვდა დაცემული და სასწრაფო დახმარების მოსვლამდე სცადა მას დახმარებოდა. სასწრაფო დახმარების ბრიგადამ, მოსვლის შემდეგ, ის გარდაცვლილად გამოაცხადა.

ფოტოზე, რომელიც OC Media-მ მოიპოვა, ჩანს ელვინის სხეულის დაზიანებები, მრავალი დიდი ზომის სისხლჩაქცევა.

შინაგან საქმეთა სამინისტროს ვერსიები

ელვინის გარდაცვალების შემდეგ, აზერბაიჯანის შსს-მ უარყო, რომ ის პოლიციამ სცემა — ამტკიცებენ, რომ ის გულის შეტევითა და ღვიძლის ციროზით გარდაიცვალა.

"ამერიკის ხმისთვის" მიცემულ განცხადებაში სამინისტრომ აღნიშნა, რომ პოლიცია გვიან ღამით გამოეხმაურა სუმგაიტში მდებარე კაფეში "რამდენიმე მთვრალ ადამიანს“ შორის დაპირისპირებას.

"მხარეებს შორის დაძაბულობის მოხსნის შემდეგ, ისინი პოლიციის განყოფილებაში გადაიყვანეს. ერთ-ერთმა მათგანმა, ელვინმა, მოულოდნელად წონასწორობა დაკარგა და პოლიციის განყოფილების წინ მიწაზე დაეცა.

ინციდენტს რამდენიმე ადამიანი, ნათესავები, მეგობრები, ძმები შეესწრნენ, ასევე, გადაღებულია სათვალთვალო კამერებით. გამოიძახეს სასწრაფო დახმარება, თუმცა ელვინ ისგანდაროვი გარდაიცვალა“, — ნათქვამია განცხადებაში.

"ექიმების თქმით, მისი გარდაცვალების მიზეზი ღვიძლის ციროზი და გულის შეტევა გახდა", —აცხადებენ სამინისტროში.

თუმცა, ისგანდაროვის ოჯახი მტკიცედ უარყოფს, რომ ელვინს ღვიძლის, ან გულის რაიმე დაავადება ჰქონდა და ასევე, აღნიშნეს, რომ ის რეგულარულად იტარებდა სამედიცინო გამოკვლევებს.

სუმგაიტის პროკურატურაში მიმართვის შემდეგ, სააგენტომ ისგანდაროვებს სთხოვა, მიეწოდებინათ მოწმეების სია, რათა დაემტკიცებინათ, რომ ელვინი პოლიციამ მოკლა.

პროკურატურამ გაავრცელა კადრები, სადაც ისგანდაროვები პოლიციის განყოფილებაში ჩანან, თუმცა ოჯახი ამბობს, რომ ვიდეო დამუშავებული იყო პოლიციის მიერ და ჩანდა მხოლოდ ის მომენტი, როდესაც ელვინი ტოვებს პოლიციის განყოფილებას და ძირს ვარდება.

იალჩინ იმანოვმა, ადამიანის უფლებათა ყოფილმა ადვოკატმა, განუცხადა OC Media-ს, რომ პროკურატურის პასუხისმგებლობა იყო მტკიცებულებების შეგროვება და ასევე, ინციდენტის მოწმეების მოძიება.

"ეს არ არის ელვინის ნათესავების პასუხისმგებლობა. თუ ამას პროკურორი ითხოვს, ეს სრულიად უკანონოა. შესაძლოა, პროკურატურამ გადაწყვიტოს დახუროს ეს საქმე, სისხლის სამართლის საქმის გახსნის გარეშე“.

ისგანდაროვებმა OC Media-ს განუცხადეს, რომ პოლიციამ უკვე დაადგინა, თუ ვინ შეესწრო დაპირისპირებას და ელვინის გარდაცვალებას და ისინი დააშინეს.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.