რა ხდება: გარემოს დაცვის და სოფლის მეურნეობის სამინისტროს დაცული ტერიტორიების სააგენტო მარტვილის სოფელ ბალდის კანიონის ირგვლივ განვითარებულ მოვლენებს ეხმაურება.

დეტალები: სააგენტო აცხადებს, რომ ისევე როგორც სამინისტრო, გმობს ძალადობას, თუმცა, აღნიშნავს, რომ მათთვის მიუღებელია ულტიმატუმების ენით საუბარი: "კიდევ ერთხელ გამოთქვამთ მზადყოფნას, სამუშაო ფორმატში შედეგზე ორიენტირებული შეხვედრისთვის".

  • დაცული ტერიტორიების სააგენტო წერს, რომ ბალდის კანიონის პროექტი, მნიშვნელოვან პოზიტიურ გავლენას იქონიებს ადგილობრივი მოსახლეობის სოციალურ-ეკონომიკურ მდგომარეობაზე, ისევე, მათივე თქმით, როგორც ეს მოხდა მარტვილის კანიონის და სხვა ბუნების ძეგლების შემთხვევაში.

სააგენტო აღნიშნავს, რომ პროექტს აპროტესტებს ადამიანების გარკვეული ჯგუფი, რომელთა მხრიდან გარემოს დაცვისა და სოფლის მეურნეობის სამინისტროსა და დაცული ტერიტორიების სააგენტოს თანამშრომლების მიმართ, ადგილი აქვს "დესტრუქციულ ქმედებებს":

  • "მათ ჩაშალეს არაერთი შეხვედრა, მათ შორის, ქალაქ მარტვილში საინფორმაციო შეხვედრა, როდესაც სოფლის მეურნეობის მინისტრის მოადგილე ადგილობრივ მოსახლეობასთან სასაუბროდ იყო ჩასული".

კონტექსტი: შინაგან საქმეთა სამინისტრომ, განზრახ მკვლელობის მცდელობის და მუქარის ბრალდებით, დააკავა ორი ძმა, რომლებიც 11 ივნისს, ბალდის კანიონის მცველებს კარავში თავს დაესხნენ.

  • ერთ-ერთმა ბრალდებულმა, ურთიერთშელაპარაკების ნიადაგზე, ცივი იარაღის გამოყენებით, თანასოფლელი დაჭრა, შემთხვევის დროს დაზიანება მიიღო კიდევ ერთმა პირმა.
  • ბრალდებულები, ცივი იარაღისა და სანადირო თოფის დემონსტრირებით ადგილობრივებს სიცოცხლის მოსპობითაც დაემუქრნენ.

12 ივნისს, პოლიციამ დააკავა დიკო ბჟალავა, მოძრაობა ბალდის კანიონის შესანარჩუნებლად წევრი.

  • გამოძიება სისხლის სამართლის კოდექსის 151-ე მუხლით მიმდინარეობს, რაც მუქარას გულისხმობს.
  • მოძრაობის თქმით, ბჟალავა დააკავეს, ბალდის კანიონის მცველების კარავში თავდასხმაში ბრალდებულის ცოლის საჩივრის საფუძველზე.

გაიგე მეტი: "ბალდაში მდგომარეობა დღითიდღე საშიშ ფორმებს იღებს, სახელმწიფომ ყველა ნაბიჯი უნდა გადადგას სიტუაციის განსამუხტად" — იოსელიანი