გარემოსა და ბუნებრივი რესურსების დაცვის სამინისტროს საჯარო მოხელისთვის ქრთამის მიცემის ბრალდებით სახელმწიფო უსაფრთხოების სამსახურმა შპს ლადი 2011-ის დამფუძნებელი დააკავა. დაკავების შესახებ ინფორმაციას სუს-ის პრესსამსახური ავრცელებს.

გამოძიების ინფორმაციით, დაკავებული გარემოსა და ბუნებრივი რესურსების დაცვის სამინისტროს გარემოსდაცვითი ზედამხედველობის დეპარტამენტის უფროს სპეციალისტს დაუკავშირდა და უთხრა, რომ სურდა ლანჩხუთის რაიონში მდინარე სუფსას სანაპიროდან უკანონოდ მოეპოვებინა სასარგებლო წიაღისეული.

"ბრალდებულმა საჯარო მოხელეს სთხოვა აღნიშნულ საქმიანობაში სამსახურებრივი მფარველობა თავის ხელმძღვანელთან შეთანხმებით, რის სანაცვლოდ დაჰპირდა, რომ წინასწარ ქრთამის სახით მისცემდა მის მიერ ყოველთვიურად მოსაპოვებელი ქვიშა-ღორღის საფასურს, ერთ კუბზე 50 თეთრის ოდენობით", - აღნიშნავენ სუს-ში.

მათივე თქმით, დაკავებულმა საჯარო მოხელეს, წინასწარ ქრთამის სახით, გადასცა მოსაპოვებელი 8 ათსი კუბი ქვიშა-ღორღის უკანონოდ მოპოვების საფასური - 4 ათასი ლარი, რა დროსაც იგი სუს-ის ანტიკორუფციული სააგენტოს თანამშრომლებმა ბრალდებულის სახით დააკავეს.

საქმეზე გამოძიება უკანონო ქმედების ჩასადენად ქრთამის მიცემის მუხლით (სსსკ-ის 339-ე მუხლის მეორე ნაწილი) მიმდინარეობს. ამ დანაშაულის დამტკიცების შემთხვევაში ოთხიდან შვიდ წლამდე პატიმრობაა გათვალისწინებული.