შენმა კლასმა თუ რაიმე მიზეზით ვერ აღნიშნა ბოლო ზარი, იმედს ნუ დაკარგავ — სკოლის დამთავრების საზეიმოდ კიდევ, სულ მცირე, ნახევარი საუკუნე გაქვთ. აშშ-ში, ოკლაჰომის შტატში, ქალაქ მურის სკოლის 1974 წლის კურსდამთავრებულებმა გამოსაშვები ცერემონია სწორედაც რომ ნახევარი საუკუნის დაგვიანებით გამართეს.

საქმე ისაა, რომ თავის დროზე, 1974 წლის 23 მაისს, როცა ლურჯ ფორმებში გამოწყობილი კლასელები სტადიონზე შეიკრიბნენ და ატესტატების გადაცემას უცდიდნენ, ცაზე მოიღრუბლა, ცოტა ხანში კი სკოლის წარმომადგენელი გამოჩნდა და მიკროფონში გამოაცხადა, რომ ქალაქს ქარიშხალი უახლოვდებოდა, რის გამოც ყველას სასწრაფოდ უნდა დაეტოვებინა ადგილი.

ასე ჩაიშალა ნანინანატრი გამოსაშვები ღონისძიება — იმის გამო, რომ მომდევნო დღეებში 500-მდე მოსწავლე ექსკურსიაზე მიდიოდა, მისი სხვა დროს გადადებაც ვერ მოხერხდა. მოგვიანებით, კურსდამთავრებულებს უთხრეს, რომ ცერემონიის გარეშე გაეტანათ თავ-თავიანთი ატესტატები სემესტრის დასრულებამდე. მას შემდეგ, 50 წლის განმავლობაში, კლასელები ამაოდ ცდილობდნენ, გამოსაშვების ორგანიზებისთვის თავი მოებათ.

საბოლოოდ, ღონისძიების ორგანიზება სკოლის ახლანდელი დირექტორის დამსახურებით მოხერხდა, რომელიც ნახევარი საუკუნის წინანდელ კურსდამთავრებულებზე 14 წლით უმცროსია.

"სულ რაღაც 50 წელი დაგვჭირდა" — ფოტო ნახევარი საუკუნის დაგვიანებით გამართული გამოსაშვებიდან.

ფოტო: Sterling Crim

მურის სკოლის 1974 წლის ბოლო ზარი კი, როგორც იქნა, დაირეკა. კვლავაც ლურჯ ფორმებში გამოწყობილი თანაკლასელები სცენაზე დამსახურებული ატესტატების მისაღებად ავიდნენ. ახლა ჩვენი შვილიშვილები გვიყურებენო, აღნიშნა ერთ-ერთმა მათგანმა.

კლასის პრეზიდენტმა ის სიტყვა წაიკითხა, რომლის წარმოთქმასაც 50 წლის წინ გეგმავდა. ღონისძიებაზე გარდაცვლილი თანაკლასელებიც არ დაივიწყეს და მათი ოჯახის წევრები მიიწვიეს.

"ძალიან უჩვეულო ამბავია", — განაცხადა სკოლის დირექტორმა, — "ასეთი რამ არც კი მსმენია. ისინი კვლავაც ჩვენი საზოგადოების ნაწილი არიან და ამას მათ გამო ვაკეთებთ".

რაც მთავარია, ამჯერად ქალაქის თავზე მზე კაშკაშებდა.