მიხეილ სააკაშვილი რუსთავი 2-თან ექსკლუზიურ ინტერვიუში ამბობს, რომ უკრაინის პრეზიდენტი, პეტრო პოროშენკი საქართველოში ვიზიტისას ბიძინა ივანიშვილს შეხვდა. მისივე მტკიცებით, საუბრის ერთ-ერთი თემა თავად სააკაშვილი იყო:

"რა თქმა უნდა, რაღაც რეპრესია მოსალოდნელი იყო. მე პატარა ბავშვი არ ვარ, საქართველოში ტყუილად არ ჩავიდა [პეტრო პოროშენკო], ივანიშვილს ტყუილად არ შეხვდა, ბათუმში ჩასვლა ტყუილად არ მოიგონა იმიტომ, რომ ურეკში უნდოდა შევლა, ტყუილად არ ილაპარაკეს დიდი ხანი, რა თქმა უნდა, რაღაცას გადადგამდნენ ნაბიჯს."

უკრაინის პრეზიდენტი საქართველოს ოფიციალური ვიზიტით 17 ივლისს ეწვია. პეტრო პოროშენკომ შეხვედრები გამართა საქართველოს პრეზიდენტთან, პრემიერ-მინისტრთან და პარლამენტის თავმჯდომარესთან. ვიზიტის ფარგლებში, პოროშენკო იმყოფებოდა სოფელ ხურვალეთში საოკუპაციო ხაზთან, ასევე, სვანეთსა და აჭარაში.

26 ივლისს გავრცელდა ინფორმაცია, რომ საქართველოს ექს-პრეზიდენტს, მიხეილ სააკაშვილს უკრაინის მოქალაქეობა ჩამოართვეს. ამის მიზეზი შესაბამისი კანონის ერთ-ერთი მუხლი, რაც მოქალაქეობის მიღებას ტყუილის გამოყენებით გულისხმობს. სააკაშვილი ახლა ამერიკის შეერთებულ შტატებში იმყოფება და ამბობს, რომ მოქალაქეობის დასაბრუნებლად იბრძოლებს. მისივე მტკიცებით, ის, თავის გუნდთან ერთად, აუცილებლად შეცვლის უკრაინის ხელისუფლებას.