რა ხდება: აჭარის არასამთავრობო ორგანიზაციები აცხადებენ, რომ ბათუმში, 31 მაისიდან რუსული კანონის საპროტესტო აქციებში ჩართულ პირებს, უფლებადამცველების და მათი ოჯახის წევრებს, ყოველდღიურად ემუქრებიან და სიტყვიერ შეურაცხყოფას აყენებენ.

ორგანიზაციები მოუწოდებენ საქართველოს/აჭარის პროკურატურას

• დაიწყოს სისხლისსამართლებრივი დევნა იმ პირების მიმართ, რომელთა მიერ დანაშაულის ჩადენაც შესაძლებელია არაერთი მტკიცებულებით დადასტურდეს;
• უმოკლეს ვადებში მიანიჭოს პირებს დაზარალებულის სტატუსი;
• საზოგადოებას პერიოდულად მიაწოდოს ინფორმაცია გამოძიების დაწყების, ჩატარებული საგამოძიებო მოქმედებებისა და გამოძიების შედეგების შესახებ.

დეტალები: განცხადების მიხედვით, ზარის განმახორციელებლები იყენებენ სიძულვილის ენას, ადრესატებს ემუქრებიან ჯანმრთელობის დაზიანების და სიცოცხლის მოსპობით, მიმართავენ შემდეგი სიტყვებით: "აგაორთქლებთ", "გაგაქრობთ".

• "აქტივისტებთან, მათი ოჯახის ორსულ და არასრულწლოვან წევრებთან, სტუდენტებთან და მოსწავლეებთან განხორციელებული ზარების სისტემურობა, დავიწროებულ ადრესატთა წრე და სიხშირე აჩენს ვარაუდს, რომ მონაცემთა დამუშავება კანონის დარღვევით, სახელმწიფო უწყებების ბაზების გამოყენებით ხდება", — წერენ არასამთავროები.
• მათივე თქმით, პოლიტიკური პარტიებისა და არასამთავრობო ორგანიზაციების ოფისებსა და აქტივისტების საცხოვრებელი სახლის კედლებზე, შეურაცხმყოფელი და ირიბი მუქარის შემცველი წარწერები და უცენზურო ნახატები გაკეთდა, რაც "მოქალაქეებს უჩენთ საფრთხის და დაუცველობის განცდას".

ორგანიზაციები წერენ, რომ ოცნების წევრმა დიმიტრი სამხარაძემ, პრაქტიკულად, აღიარა, რომ ბათუმში განხორციელებული უკანონო ქმედებები მმართველი გუნდის ორგანიზებულია. მანვე გააზიარა ვიდეომტკიცებულება თუ როგორ ტოვებენ წარწერებს ოფისებთან და საცხოვრებელი კორპუსების სადარბაზოებში, აქტივისტების საცხოვრებელ სახლებთან წარწერებს, ჩანაწერებში ისმის მუქარა, შეურაცხმყოფელი ლექსიკა:

• "ეს ქართული ოცნების ე.წ. ტიტუშკების ხელწერა, უკანონობის დამკვეთი კი მმართველი პარტიაა", — წერია განცხადებაში.

ამ თემაზე: დეპუტატი დიტო სამხარაძე აღიარებს, რომ შეურაცხმყოფელი წარწერების ორგანიზატორი თავად არის

არასამთავროები მიიჩნევენ, რომ სატელეფონო ზარები და საცხოვრებელ სახლებთან გაკეთებული ვანდალიზმისა და მუქარის შინაარსის მქონე წარწერები ქმნის სისხლის სამართლის კოდექსის რამდენიმე მუხლით საქმის კვალიფიკაციის საფუძველს, კერძოდ:

• "აშკარაა სიცოცხლის მოსპობის ან ჯანმრთელობის დაზიანების ანდა ქონების განადგურების მუქარა;
• ადამიანის დევნა სიტყვის, აზრის, სინდისის გამო ანდა მის პოლიტიკურ, საზოგადოებრივ, პროფესიულ საქმიანობასთან დაკავშირებით;
• ადამიანისათვის ქმედების თავისუფლების უკანონო შეზღუდვა, ასევე, აშკარაა სხვისი ნივთის დაზიანების ფაქტები".

განცხადებას ხელს აწერენ:

• თავისუფალ ჟურნალისტთა სახლი;
• მხარდაჭერის და შესაძლებლობის განვითარების ცენტრი;
• დემოკრატიის ინსტიტუტი;
• ჩვენი თაობა;
• საორსა;
• შშმ ქალთა ალიანსი;
• ბათუმის დამოუკიდებელი ცხოვრების ცენტრი;
• სოლიდარობის თემი;
• საქართველოს ახალგაზრდა იურისტთა ასოციაცია;
• სამოქალაქო საზოგადოების ინსტიტუტის ბათუმის ფილიალი;
• მწვანე სექტორი;
• ფლორა და ფაუნა;
• საერთაშორისო გამჭვირვალობა — საქართველო;
• ცვლილებები თანაბარი უფლებებისათვის;
• ბათუმის დემოკრატიული ჩართულობის ცენტრი;
• აღმოსავლეთ ევროპის ცენტრი მრავალპარტიული დემოკრატიისთვის;