მოკლედ: ბიზნესმენი და Wissol ჯგუფის დამფუძნებელი, სოსო ფხაკაძე, ლინკდინზე წერს, რომ ხელისუფლებამ "ქვეყანაში შექმნილი სიტუაციის განსამუხტად", ვეტოს განხილვა უნდა გადადოს, ან კანონის ამოქმედების ვადად, 2025 წლის დასაწყისი განსაზღვროს.

დეტალები: ფხაკაძის თქმით, იმ შემთხვევაში თუ ხელისუფლება ვეტოს განხილვას გადადებს, ეს დრო უნდა გამოიყენოს ქვეყნის სტრატეგიულ პარტნიორებთან კონსულტაციებისთვის, რომ ქვეყნის კონსტიტუციით გარანტირებული საგარეო პოლიტიკური კურსი არ დაზიანდეს.

  • ბიზნესმენი წერს, რომ თუ რუსული კანონის ამოქმედების ვადა იქნება 2025 წლის დასაწყისი, მაგალითად 1-ელი იანვარი, 2024 წლის საპარლამენტო არჩევნების შედეგები განსაზღვრავს რამდენად მისაღებია ეს კანონი მოსახლეობისთვის.
  • "იმედი მაქვს, ჩემი გულწრფელი მოსაზრებები გათვალისწინებული იქნება უფლებამოსილი პირების მიერ, რაც ხელს შეუწყობს ჩვენი ქვეყნის განვითარების ნორმალურ რეჟიმში დაბრუნებას", — წერს ფხაკაძე.

2024 წლის 30 აპრილს, საერთაშორისო გამჭვირვალობა — საქართველომ (TI) გამოაქვეყნა რუსული კანონის მხარდამჭერი ბიზნესმენების სია და მონაცემები, თუ რა კავშირი აქვთ მათ ქართულ ოცნებასთან.

TI-ის მიხედვით, ძმები ფხაკაძეების ბიზნესის დიდი ნაწილი ამერიკულ ბრენდებს — ვენდისსა და დანკინს იყენებს, იმის ფონზე, რომ ისინი მხარს უჭერენ რუსულ კანონს, რომელიც ამერიკას მტრად აცხადებს.

ფოტო: საერთაშორისო გამჭვირვალობა - საქართველო

  • ტენდერები: ძმები ფხაკაძეების კომპანია ვისოლს სახელმწიფო შესყიდვებიდან 100 მილიონ ლარზე მეტი აქვს მიღებული 2013 წლიდან.
  • კორუფციული ბრალდებები: 2013 წლამდე კომპანია ვისოლი მომხმარებელს და სახელმწიფოს ატყუებდა, რომ საქართველოში "აპი სუპერის" ბენზინს ყიდდა, მაშინ, როდესაც საბაჟოს ოფიციალური მონაცემებით ეს ბენზინი საერთოდ არ შემოდიოდია ქვეყანაში, — წერს TI.

გაიგე მეტი: რუსული კანონის მხარდამჭერი ბიზნესმენების სია: კავშირები მთავრობასთან, შემოწირულება და კორუფციული ბრალდებები

კონტექსტი: დღეს, 27 მაისს, პარლამენტის იურიდიულმა კომიტეტმა რუსულ კანონზე პრეზიდენტის მოტივირებული შენიშვნები არ გაიზიარა და ვეტოს დაძლევას მხარი დაუჭირა.

  • საკითხი პლენარულ სხდომაზე განსახილველად, სავარაუდოდ, ხვალ გავა.
  • ხვალ პარლამენტთან გაიმართება რუსული კანონის საპროტესტო აქცია სახელწოდებით — რუსული კანონით არ ვიცხოვრებთ!