ეროვნულ-დემოკრატიული ინსტიტუტის (NDI) მიერ გამოკითხული მოქალაქეების 56 პროცენტი მიიჩნევს, რომ აფგან მუხტარლის გატაცების საქმემ საქართველოზე, როგორც ადამიანის უფლებებსა და მედიის თავისუფლებაში რეგიონის ლიდერის პოზიციაზე, უარყოფით გავლენას მოახდენს.

გამოკითხულა ორი პროცენტი მიიჩნევს, რომ ამ ფაქტს რეპუტაციაზე ექნება დადებითი გავლენა, 15 პროცენტის მოსაზრებით, არანაირი გავლენა არ ექნება, ხოლო 26 პროცენტს ამ კითხვაზე პასუხი არ აქვს.

კვლევა დიდი ბრიტანეთის მთავრობის, UK aid-ის ფინანსური ხელშეწყობით ჩატარდა, გამოკითხვას კი CRRC-საქართველო ატარებდა. კვლევის საველე სამუშაოები 18 ივნისი - 9 ივლისის პერიოდში, საქართველოს მასშტაბით (ოკუპირებული ტერიტორიების გამოკლებით) შესრულდა. 2 261 პირი, პირისპირ ინტერვიუს სახით, წარმომადგენლობითი შერჩევით გამოიკითხა.

თბილისიდან 29 მაისს გაუჩინარებული აზერბაიჯანელი ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა. საქართველოს ხელისუფლებას ამ საქმის გამოძიება ჯერ არ დაუსრულებია.