მოკლედ: საქართველოს ოპოზიციური პარტიები საერთო განცხადებას ავრცელებენ და აცხადებენ, რომ აფასებენ ამერიკის შეერთებული შტატების ურყევ და ქმედით ძალისხმევას საქართველოს კონსტიტუციის, სუვერენიტეტისა და თავისუფლების, საქართველოს ევროპული და ევროატლანტიკური მომავლის დაცვის საქმეში.

  • ერთობლივ განცხადებას ხელს აწერენ პარტიები: ახალი, გირჩი — მეტი თავისუფლება, დროა, ერთიანი ნაციონალური მოძრაობა, ლელო საქართველოსთვის, რესპუბლიკური პარტია და სტრატეგია აღმაშენებელი.

განცხადება: "აშშ-ის ამგვარი მხარდაჭერა საქართველოს თავისუფალი მოქალაქეების უწყვეტი, პრინციპული, მშვიდობიანი პროტესტის დამსახურებაა, რომელსაც ოლიგარქ ივანიშვილის მთავრობა ძალადობით პასუხობს.

გვინდა მივმართოთ იმ ადამიანებს, რომლებიც ჯერ კიდევ რჩებიან რუსული რეჟიმის სამსახურში:

  • იმ შემთხვევაში, თუ გადაწყვეტთ, ჩამოშორდეთ რუსულ რეჟიმს და შეუერთდეთ ქართველ ხალხს ჩვენი სამშობლოს ევროკავშირისა და ნატოში გაწევრიანებისთვის ბრძოლაში, კიდევ გრჩებათ შანსი, დაიცვათ საკუთარი თავი და ოჯახები საერთაშორისო სანქციებისგან.
  • გადმოდით სიმართლის მხარეს. ამ შემთხვევაში მზად ვართ ვიმოქმედოთ ჩვენი შესაძლებლობის ფარგლებში, რომ ხელი შევუწყოთ თქვენი და თქვენი ოჯახების განრიდებას სანქციების მძიმე შედეგებისგან.
  • საქართველო ეკუთვნის არა რუს ოლიგარქს, არამედ თითოეულ ჩვენგანს! კი ევროპას, არა რუსულ რეჟიმს!".

კონტექსტი: ამერიკის სახელმწიფო მდივნის, ენტონი ბლინკენის განცხადებით, საქართველოს ხელისუფლების წინააღმდეგ სავიზო შეზღუდვები დაწესდება.

  • ეს შეზღუდვები გავრცელდება მათ ოჯახის წევრებზეც.
  • ბლინკენი აცხადებს, რომ ნებისმიერი, ვინც ძირს გამოუთხრის დემოკრატიულ პროცესებს, ან ინსტიტუტებს საქართველოში, მათ შორის — ოქტომბრის არჩევნების წინ, მის განმავლობაში, ან არჩევნების შემდეგ, შეიძლება, ამ პოლიტიკის მიხედვით, შეუსაბამო აღმოჩნდეს ამერიკის ვიზის ასაღებად და აეკრძალოს აშშ-ში გამგზავრება.

გაიგე მეტი: აშშ საქართველოს ხელისუფლებას და მათ ოჯახის წევრებს სავიზო შეზღუდვებს უწესებს — რა თქვა ენტონი ბლინკენმა