რა ხდება: ამერიკის სახელმწიფო მდივნის, ენტონი ბლინკენის განცხადებით, საქართველოს ხელისუფლების წინააღმდეგ სავიზო შეზღუდვები დაწესდება.

• ეს შეზღუდვები გავრცელდება მათ ოჯახის წევრებზეც.

დეტალები: ბლინკენის განცხადებაში წერია, რომ:

ქართულმა ოცნებამ შეიმუშავა და მიიღო "უცხოური გავლენების“ შესახებ კანონი, რომელიც შეზღუდავს შეკრებისა და გამოხატვის თავისუფლებას, მოახდენს იმ ორგანიზების სტიგმატიზებას, რომლებიც ემსახურებიან საქართველოს მოქალაქეებს, ასევე, ხელს უშლის დამოუკიდებელ მედია ორგანიზაციების მუშაობას, მიაწოდონ საქართველოს მოსახლობას მაღალი ხარისხის ინფორმაცია.

• "მას შემდეგ, რაც საქართველოს მოქალაქეებმა გამოთქვეს წინააღმდეგობა კანონის მიმართ, ვნახეთ აშკარა მინიშნებები დაშინებისა და ძალადობის გამოყენების შესახებ, მშვიდობიანი, განსხვავებული აზრის ჩასახშობად. როგორც "ეროვნული უსაფრთხოების კანონი“, ასევე, რეპრესიული ტაქტიკა, პროტესტის ჩასახშობად, ძირს უთხრის საქართველოს დემოკრატიას და ფუნდამენტურ თავისუფლებებს, რაც ქართველი ხალხის უფლებაა და ეწინააღმდეგება საქართველოს გრძელვადიან მიზანს, რომელიც ასახულია მის კონსტიტუციაში — ევროატლანტიკურ ინტეგრაციასა და სტრატეგიულ პარტნიორობას შეერთებულ შტატებთან.
• ამ ქმედებების საპასუხოდ, სახელმწიფო დეპარტამენტი ახორციელებს საქართველოსთვის სავიზო შეზღუდვის ახალ პოლიტიკას, რომელიც გავრცელდება იმ პირებზე, რომლებიც პასუხისმგებლები, ან თანამონაწილეები არიან საქართველოში დემოკრატიისთვის ძირგამომთხრელ საქმიანობაზე, ასევე, მათი ოჯახის წევრებზე.
• შეზღუდვა შეეხება პირებს, რომლებიც პასუხისმგებელი არიან საქართველოში სამოქალაქო საზოგადოებისა და მშვიდობიანი შეკრების თავისუფლების შეზღუდვაზე ძალადობის, ან დაშინების გზით", — წერია განცხადებაში.

ამას გარდა, ბლინკენი აცხადებს, რომ ნებისმიერი, ვინც ძირს გამოუთხრის დემოკრატიულ პროცესებს, ან ინსტიტუტებს საქართველოში, მათ შორის — ოქტომბრის არჩევნების წინ, მის განმავლობაში, ან არჩევნების შემდეგ, შეიძლება, ამ პოლიტიკის მიხედვით, შეუსაბამო აღმოჩნდეს ამერიკის ვიზის ასაღებად და აეკრძალოს აშშ-ში გამგზავრება.

ასევე, ეს შეზღუდვა, შესაძლოა, შეეხოს ამ პირების ოჯახის წევრებსაც.

ამერიკის სახელმწიფო მდივანი იწყებს აშშ-ისა და საქართველოს შორის ორმხრივი თანამშრომლობის ყოვლისმომცველ მიმოხილვას.

• "იმედს ვიტოვებთ, რომ საქართველოს ლიდერები გადახედავენ კანონპროექტს და მიიღებენ ზომებს, მათი ერის დემოკრატიული და ევროატლანტიკური მისწრაფებების პროგრესისთვის. ჩვენს ქვეყნებს შორის ურთიერთობის განხილვის პროცესში, გავითვალისწინებთ საქართველოს ქმედებებს, ჩვენი გადაწყვეტილების მიღებისას", — წერს ენტონი ბლინკენი.

ბოლო ხაზი: საქართველოს ხელისუფლების წინააღმდეგ სანქციების დაწესებაზე ამერიკელი კანონმდებლებიც მუშაობენ.

შესაბამისი კანონპროექტები შედის როგორც კონგრესში, ისე — სენატში.