მოკლედ: პარლამენტის მიერ, რუსული კანონის საბოლოოდ მიღების შემდეგ, მოქალაქეები კიდევ ერთი პარტიაა საპარლამენტო ოპოზიციიდან, რომელმაც ბოიკოტის შესახებ განაცხადა.

  • ამის შესახებ ჟურნალისტებთან კომენტარისას პარტიის თავმჯდომარემ, ალეკო ელისაშვილმა ისაუბრა.

ალეკო ელისაშვილი: "მე და ქეთი თურაზაშვილი წარმოვადგენთ პარლამენტში ჩვენს პარტიას და ახლა იმ პარლამენტში რაიმე რუტინულ საქმიანობაში მონაწილეობის ვერანაირ აზრს ვერ ვხედავთ.

  • ოთხი წელი მართლა გულით ვცდილობდი, დამემტკიცებინა ხალხისთვის, რომ იქ უბრალოდ, ხელფასის ასაღებად არ ვიყავი; მთელი გულით ვიყავი ყველაფერში ჩართული, მაგრამ ახლა, ჩვენ, რა თქმა უნდა, ვუერთდებით ბოიკოტს."

ელისაშვილმა, ასევე, აღნიშნა, რომ რუსული ხელისუფლებისა და რუსული კანონის წინააღმდეგ პოლიტიკური პროცესი ახლა ქუჩაშია მშვიდობიანი წინააღმდეგობის სახით.

კონტექსტი: ამ დრომდე ცნობილი იყო, რომ პარლამენტის საქმიანობას ბოიკოტს უცხადებენ პარტიები — ერთიანი ნაციონალური მოძრაობა და ლელო საქართველოსთვის.

  • ენმ-ში თქვეს, რომ გადავიდნენ ბოიკოტის რეჟიმში როგორც საპარლამენტო საქმიანობაში, ისე ყველა მუნიციპალიტეტის საკრებულოში.
  • ბოიკოტზე უარი თქვა პარტიამ საქართველოსთვის. ყოფილი პრემიერ-მინისტრის, გიორგი გახარიას გუნდის წევრებმა განაცხადეს, რომ საპარლამენტო ბოიკოტს არ უერთდებიან: " გამოვიყენებთ ყველა ტრიბუნას", — თქვეს მათ.

მსგავსი: ლელო — "უნდა შეიქმნას ეროვნული წინააღმდეგობის ევროპული პლატფორმა, სალომე ზურაბიშვილთან მჭიდრო კოორდინაციით