რა ხდება: რუსული კანონის საწინააღმდეგო აქციის ორგანიზატორებს და პოლიტიკურ ლიდერებს სამართალდამცველები გამოკითხავენ.

დეტალები: მიზეზი არის 8 მაისს ცენტრალური კრიმინალური პოლიციის დეპარტამენტში დაწყებული გამოძიება სისხლის სამართლის კოდექსის სამი მუხლით:

  • სისხლის სამართლის კოდექსის 222-ე მუხლით, რაც გულისხმობს სტრატეგიული ან განსაკუთრებული მნიშვნელობის ობიექტის ხელში ჩაგდებას ან ბლოკირებას.
  • ასევე, სისხლის სამართლის კოდექსის 225-ე მუხლით, რაც ჯგუფური ძალადობის ორგანიზებას, ხელმძღვანელობას ან მასში მონაწილეობას გულისხმობს

და

  • 226-ე მუხლით, რაც გულისხმობს ჯგუფური მოქმედების ორგანიზებას, რომელიც უხეშად არღვევს საზოგადოებრივ წესრიგს ან დაკავშირებულია ხელისუფლების წარმომადგენლის კანონიერი მოთხოვნისადმი აშკარა დაუმორჩილებლობასთან, ან რომელმაც ტრანსპორტის, დაწესებულების ან ორგანიზაციის მუშაობის შეფერხება გამოიწვია.

ამის შესახებ ცნობილი გახდა თბილისის პოლიციის დეპარტამენტის დირექტორის სულხან თამაზაშვილის ბრიფინგზე.

თამაზაშვილის თქმით, ამ სისხლის სამართლის საქმეებთან დაკავშირებით შინაგან საქმეთა სამინისტრო ატარებს აქტიურ საგამოძიებო მოქმედებებს.

  • "მათ შორის, ახორციელებს ყველა იმ მოწოდების, საჯარო გამოსვლისა და მიმართვის, ასევე, ვიდეომასალების შესწავლას, რომელიც სისხლის სამართლის დანაშაულის ნიშნებს შეიცავს.
  • გამოძიების ფარგლებში, სამართალდამცველების მხრიდან, საგამოძიებო ორგანოში მოხდება აქციის ორგანიზატორების, პოლიტიკური ლიდერებისა და ყველა იმ პირის გამოკითხვა, რომლებსაც შესაძლოა რაიმე სახის კავშირი ჰქონდეს აღნიშნულ სისხლის სამართლის საქმესთან", — თქვა მან.

ბოლო ხაზი: დღესვე ცნობილი გახდა, რომ 8-9 მაისს აქციების მონაწილე 6 პირი დააკავეს.