მოკლედ: შინაგან საქმეთა სამინისტრო აცხადებს, რომ რუსული კანონის საწინააღმდეგო აქციის მონაწილეები, ტრანსპორტის სავალ ნაწილს ხელოვნურად კეტავენ, რაც, მათი თქმით, ხელს უშლის დაწესებულებებისა და ორგანიზაციების ფუნქციონირებას და ლახავს იმ პირთა უფლებებს, რომლებიც აქციის მიმდებარე ტერიტორიაზე ცხოვრობენ და მუშაობენ.

დეტალები: შსს წერს, რომ რუსთაველის გამზირსა და პარლამენტის შენობის ტერიტორიაზე მიმდინარე აქციების დროს, მსვლელობაში მონაწილე პირთა რაოდენობა საგრძნობლად შემცირდა და ტრანსპორტის სავალი ნაწილის გადაკეტვის საჭიროება არ არსებობს:

  • "შეკრებებისა და მანიფესტაციების შესახებ საქართველოს კანონის მე-11 და 112 მუხლის თანახმად, აკრძალულია ტრანსპორტის სავალი ნაწილის ხელოვნურად გადაკეტვა, თუ ამას არ მოითხოვს შეკრების ან მანიფესტაციის მონაწილეთა რაოდენობა.
  • აგრეთვე, აკრძალულია ტრანსპორტის გადაადგილებისათვის განზრახ დაბრკოლებების შექმნა".

შსს აქციის ორგანიზატორებს და მონაწილეებს მოუწოდებს დაემორჩილონ კანონის მოთხოვნებს, რადგან თითოეულ კანონსაწინააღმდეგო ქმედებას, სამართალდამცავი უწყების მხრიდან შესაბამისი სამართლებრივი რეაგირება მოჰყვება.

  • "იდენტიფიცირებულნი იქნებიან ის პირები, რომლებიც აქციის მონაწილეებს, ხალხის რაოდენობის სიმცირის მიუხედავად საავტომობილო გზების პარალიზებისკენ მოუწოდებენ. სამართალდამცველების მიერ მათ მიმართ შესაბამისი კანონით გათვალისწინებული ზომები გატარდება", — წერს შსს.

კონტექსტი: უკვე რამდენიმე დღეა, რუსული კანონის საწინააღმდეგო აქციები პერმანენტულად იმართება.

  • ახალგაზრდების მიერ ორგანიზებულ აქციები, ტრადიციულად, პარლამენტთან იწყება, შემდეგ კი მსვლელობით სხვადასხვა ადგილას მიდიან, საბოლოოდ კი ისევ პარლამენტის შენობასთან სრულდება.
  • მათი მოთხოვნაა, პარლამენტმა შეაჩეროს რუსული კანონპროექტის განხილვა.