საქართველოს პრემიერ-მინისტრი, გიორგი კვირიკაშვილი ოფიციალური ვიზიტით ისრაელის სახელმწიფოში იმყოფება. კვირიკაშვილი ისრაელის პრემიერ-მინისტრს ბენიამინ ნეთანიაჰუს პირისპირ შეხვდა და საქართველოში დაპატიჟა.

საქართველოს მთავრობის ადმინისტრაციის ცნობით, ორი ქვეყნის ლიდერებმა ეკონომიკური თანამშრომლობის გააქტიურებაზე, ვაჭრობისა და ტექნოლოგიების სფეროს გავითარებაზე ისაუბრეს.

გიორგი კვირიკაშვილის განცხადებით, ებრაელებსა და ქართველებს შორის პირადი კავშირები და ურთიერთობები სამაგალითოა. მისივე თქმით, ერების 26-საუკუნოვანი მეგობრული ურთიერთობები მკაფიოდ აღიბეჭდა ჩვენს ეროვნულ მეხსიერებაში:

"ბოლო რამდენიმე წლის განმავლობაში ჩვენს ორმხრივ ურთიერთობებში შეინიშნება მნიშვნელოვანი პროგრესი. წარმატება მიღწეულია პრაქტიკულად ყველა სფეროში, იქნება ეს სოფლის მეურნეობა, მაღალი ტექნოლოგიები, უსაფრთხოება და, როგორც თქვენ უკვე ახსენეთ, ჩვენი ქვეყნები დგანან მსგავსი საფრთხეების წინაშე. ჩვენ მტკიცე მხარდაჭერას ვუცხადებთ თქვენს ხალხსა და სახელმწიფოს გრძელვადიანი სტაბილურობისთვის ბრძოლაში."

ერთობლივ პრესკონფერენციაზე ბენიემინ ნეთანიაჰუმ, ასევე, გაუსვა ხაზი ქართულ-ებრაული კავშირის ისტორიას. მისი თქმით, ასი ათასობით ებრაელი საქართველოდან, ამჟამად ისრალეში ცხოვრობს. ნეთანიაჰუს თქმით, საქართველოსა და ისრაელს ისლამური ტერორის დასამარცხებლად თანამშრომლობა მართებთ:

"ვგეგმავთ, გავზარდოთ არსებული თანამშრომლობა უსაფრთხოების, ჯანდაცვის და სხვა ისეთი სფეროების ფარგლებში, რომლებიც მოსახლეობას უკეთეს და უფრო უსაფრთხო ცხოვრების პირობებს შეუქმნის. საქართველოში ვიზიტის შემდეგ მე მოსახლეობის ნიჭით, მეგობრული განწყობით, ისრაელის მოქალაქეთა მიმართ განსაკუთრებული სითბოთი გაოცებული დავრჩი. ჩვენ მსოფლიოს რთულ წერტილებში გვიწევს მუშაობა, თუმცა ჩვენ ვართ მცირე ქვეყნები დიდი მომავლით. მიმაჩნია, რომ ჩვენს ერებს თანამშრომლობის შედეგად უკეთესი მომავლის შექმნა შეგვიძლია. სწორედ ამ განწყობით მინდა მოგესალმოთ აქ, იერუსალიმში."