მოლდოველებს უკვე მესამე წელია უვიზოდ შეუძლიათ იმოგზაურონ შენგენის წევრ ქვეყნებში. მოლდოვის საგარეო საქმეთა სამინისტროს ცნობით, ვიზალიბერალიზაციის ამოქმედებიდან, 2014 წლის 28 აპრილიდან, ორი წლის თავზე, ჯამში 577 058 ბიომეტრიული პასპორტის მქონე მოქალაქე 1 400 122-ჯერ გაემგზავრა ევროკავშირის მიმართულებით.

მოლდოვის სასაზღვრო დეპარტამენტის, შინაგან საქმეთა სამინისტროსა და ინფორმაციული ტექნოლოგიებისა და კომუნიკაციების სამინისტროს მონაცემებით, 2014 წლის პირველი მაისიდან 2016 წლის 29 თებერვლამდე, 3 453 ადამიანს უთხრეს შესვლაზე უარი და 6 677 არალეგალურად დარჩა შენგენის წევრ ქვეყნებში.

მოლდოვაში ბიომეტრიული პასპორტის მქონე ყველა მოქალაქეს აქვს ევროკავშირთან უვიზო რეჟიმით სარგებლობის უფლება, მათ შორის, დნესტრისპირეთის მცხოვრებლებსაც.

საქართველოს მოქალაქეებისთვის, ოთხი თვის წინ, 28 მარტს ამოქმედდა უვიზო მიმოსვლა. როგორც შს მინისტრის მოადგილე, შალვა ხუციშვილი ამბობს, ამოქმედებიდან დღემდე, ჯამში სულ 55 ათასი მოქალაქე გაემგზავრა და აქედან 90 დღის ვადაში, საქართველოში, ამ ეტაპზე სამი ათასი არ დაბრუნდა. ბიომეტრიული პასპორტის მფლობელებს ყოველ 180 დღეში შეუძლიათ 90 დღე მიყოლებით ან გადანაწილებით უვიზოდ ესტუმრონ შენგენის ზონის ქვეყნებს.