ევროკავშირთან უვიზო რეჟიმის ამოქმედებიდან დღემდე, ჯამში სულ 55 ათასი მოქალაქე გაემგზავრა და აქედან 90 დღის ვადაში საქართველოში ამ ეტაპზე სამი ათასი არ დაბრუნდა. ამის შესახებ სტატუსტიკური ინფორმაცია შს მინისტრის მოადგილემ შალვა ხუციშვილმა, სააგენტო IPN-ს მიაწოდა.

ხუციშვილის განმარტებით, არ შეიძლება ითქვას, რომ აღნიშნულმა სამმა ათასმა ადამიანმა ევროკავშირთან არსებული 90-დღიანი უვიზო რეჟიმი დაარღვია, ვინაიდან, შესაძლებელია, ამ მოქალაქეების ნაწილი ისეთ ქვეყანაში გადავიდა, რომელთანაც საქართველოს ასევე უვიზო რეჟიმი აქვს.

მინისტრის მოადგილის თქმით, აღნიშნულ მონაცემებში არ შედიან ის პირები, რომლებმაც სახმელეთო საზღვრებით ისარგებლეს.

როგორც შალვა ხუციშვილმა აღნიშნა, ვიზიტორების ყველაზე მაღალი მაჩვენებელი იმ ქვეყნებშია, სადაც პირდაპირი ავიარეისები მოქმედებს.

28 მარტს საქართველოს მოქალაქეებისთვის შენგენის ზონის ქვეყნებში უვიზო მიმოსვლა ამოქმედდა. ბიომეტრიული პასპორტის მფლობელებს ყოველ 180 დღეში შეუძლიათ 90 დღე მიყოლებით ან გადანაწილებით უვიზოდ ესტუმრონ შენგენის ზონის ქვეყნებს.