საფრანგეთმა აზერბაიჯანიდან თავისი ელჩი გაიწვია, პარიზი კი ბაქოს ორმხრივი ურთიერთობების დაზიანებაში ადანაშაულებს.

სამშაბათს საფრანგეთის საგარეო საქმეთა სამინისტრომ განაცხადა, რომ პრეზიდენტმა ემანუელ მაკრონმა ელჩი ანა ბოიონი პარიზში მიიღო, რათა განეხილათ აზერბაიჯანის მიერ "ორ ქვეყანას შორის ურთიერთობებისთვის დამაზიანებელი ცალმხრივი ქმედებების გაგრძელება".

სამინისტროში აცხადებენ, რომ მაკრონმა მოითხოვა აზერბაიჯანისგან, დააზუსტოს ინფორმაცია საკუთარი "განზრახვების" შესახებ.

აზერბაიჯანის საგარეო საქმეთა სამინისტროს სპიკერმა აიხან ჰაჯიზადემ,საფრანგეთის მიერ ელჩის გაწვევის შესახებ შეკითხვაზე თქვა, რომ საფრანგეთი 2020 წლიდან "ღია და აშკარა ანტიაზერბაიჯანული ქმედებებს ახორციელებს."

ჰაჯიზადემ, ასევე, დაადანაშაულა პარიზი აზერბაიჯანსა და სომხეთს შორის შუამავლობის პროცესში მიკერძოებულობასა და რეგიონში დაძაბულობის ესკალაციის ხელშეწყობაში.

"ამავდროულად, ნათელია, რომ საფრანგეთის ქმედებები, რომელიც ფართოდ აწვდის სომხეთს იარაღს და რეგიონში მილიტარიზმს უწყობს ხელს, არ ემსახურება მშვიდობას".

საფრანგეთსა და აზერბაიჯანს შორის დაძაბულობამ იმატა 2020 წლის მეორე მთიანი ყარაბაღის ომის შემდეგ. ბაქო ადანაშაულებს საფრანგეთს რეგიონში მორიგი სამხედრო ესკალაციის გაღვივებაში, სომხეთისთვის სამხედრო აღჭურვილობისა და დახმარების მიწოდების გზით.

2023 წლის დეკემბერში პარიზმა და ბაქომ ერთმანეთის რამდენიმე დიპლომატი გააძევეს, მას შემდეგ,, რაც აზერბაიჯანმა საფრანგეთი დიპლომატიური კრიზისის გაღვივებაში დაადანაშაულა.

აზერბაიჯანის პრო-სამთავრობო მედია იუწყებოდა, რომ აზერბაიჯანმა ამხილა ქვეყანაში მოქმედი ფრანგული ჯაშუშური ქსელი.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.