რა ხდება: On.ge-ს ინფორმაციით, მომდევნო დღეებში გერმანიის ელჩი პეტერ ფიშერი საქართველოს "გადაუდებელი საქმის" გამო ტოვებს და გერმანიაში გაემგზავრება.

• ამის შესახებ ჩვენთვის ცნობილი გახდა მას შემდეგ, რაც ორგანიზაცია მწვანე ალტერნატივამ საელჩოსგან მიიღო წერილი, რომელშიც აღნიშნულია, რომ გერმანიის ელჩი ვერ დაესწრება მათ ღონისძიებას 18 აპრილს.
• წერილში, მიზეზად დასახელებულია "გადაუდებელი საკითხის გამო" ელჩის "სასწრაფოდ" გერმანიაში გამგზავრება.

დეტალები: როგორც ორგანიზაცია მწვანე ალტერნატივის წარმომადგენელმა, მანანა ქოჩლაძემ გვითხრა, თავდაპირველად ელჩისგან მიიღეს თანხმობა ღონისძიებაზე 18 აპრილს დასწრების შესახებ.

• "ელჩი სიამოვნებით დაგვთანხმდა, ის აქტიურად თანამშრომლობს სამოქალაქო საზოგადოებასთან. გერმანიის მთავრობა ცდილობს განახორციელოს ღონისძიებები, რომელიც შეამცირებს კლიმატის ცვლილების გავლენას მოწყვლად ქვეყნებში და მათ შორის — საქართველოში", — გვითხრა ქოჩლაძემ.
• მისივე თქმით, გერმანიის საელჩოსგან მიღებულ წერილში აღნიშნულია, რომ ღონისძიებაზე ვერც ელჩის მოადგილეები მივლენ, რადგან "ისინი ან არ იქნებიან ქვეყანაში, ან — დაკავებული იქნებიან სხვა საქმეებით".

მანანა ქოჩლაძე ფიშერის გერმანიაში სასწრაფო გამგზავრებას უკავშირებს რუსულ კანონს, რომლის განხილვაც პარლამენტმა დღეს დაიწყო.

"ამას ვაკავშირებთ იმ სიტუაციასთან რაც მმართველმა პარტიამ შექმნა ქვეყანაში და რუსული კანონის მიღებასთან, რომელზეც გერმანიის კანცლერმაც უთხრა პრემიერს, რომ ეს არ არ ის მისაღები, გერმანულადაც ზუსტად ასე ჟღერდა", — თქვა ქოჩლაძემ.

• ის ვარაუდობს, რომ ელჩი, პრობლემური სიტუაციის შექმნის გამო, ვითარების განსახილველად დაიბარეს.

რას ამბობს საელჩო: გერმანიის საელჩოში NEWS.On.ge-ს უთხრეს, რომ ელჩი, ამჟამად, საქართველოშია და სამუშაო რეჟიმშია.

• ისინი არ გვეუბნებიან, აპირებს თუ არა ფიშერი გერმანიაში გამგზავრებას და ამბობენ, რომ ელჩი გერმანიის ხელისუფლებას არ გაუწვევია.
• ჩვენს დამაზუსტებელ კითხვას, რა შეიძლება იგულისხმებოდეს "გადაუდებელი საქმის გამო გამგზავრებაში", დიპლომატიურ უწყებაში გვეუბნებიან, რომ "ეს, შესაძლოა, პირადი საკითხიც იყოს".

ბოლო ხაზი: საქართველოს პრემიერ-მინისტრი, ირაკლი კობახიძე გერმანიაში 12 აპრილს იმყოფებოდა, ის შეხვდა კანცლერ ოლაფ შოლცს.

• შეხვედრის შემდეგ გამართულ პრესკონფერეციაზე შოლცმა იმედი გამოთქვა, რომ საქართველოს პარლამენტი გამჭვირვალობის შესახებ კანონს არ მიიღებდა.