მოკლედ: თამთა კალანდაძემ, ლაზარე გრიგორიადისის დედამ, On.ge-ს უთხრა, რომ მას შემდეგ, რაც პრეზიდენტი შეწყალების დოკუმენტზე ხელს მოაწერს, ლაზარე სამი დღის ვადაში უნდა გამოვიდეს ციხიდან.

  • "სავარაუდოდ, იქით კვირაში გამოვა [ლაზარე] ციხიდან, ზუსტი დღე არ ვიცით", — გვითხრა თამთა კალანდაძემ.

რა მოხდა: გუშინ, 12 აპრილს, მას შემდეგ, რაც 2023 წლის მარტის აქციების დროს დაკავებულ ლაზარე გრიგორიადისს 9-წლიანი პატიმრობა მიესაჯა, პრეზიდენტმა სალომე ზურაბიშვილმა განაცხადა, რომ ლაზარეს შეიწყალებს.

  • პრეზიდენტის თქმით, გადაწყვეტილება გუშინ, დილის 10 საათზე თავად მიიღო, ვიდრე მას შეწყალების თხოვნით ლაზარეს დაცვის მხარე, ან — პოლიტიკოსები მიმართავდნენ.

"არ დაველოდე არც არავის მოწოდებას, ასე რომ, ვერავინ ვერ ჩაითვლის ქულებს. მე ჩემი სინდისის წინაშე ჩავთვალე, რომ არასწორია, ეს ახალგაზრდა ცხრა წლით დაისაჯოს. ხელი ჯერ არ მომიწერია, პროცედურები წინ არის, მაგრამ გადაწყვეტილება მე საკუთარ თავთან ერთად, ყველანაირი გამოთქმული აზრის გარეშე მივიღე“, — განაცხადა სალომე ზურაბიშვილმა.