მაყურებლებისთვის საყვარელი Westworld შესაძლოა, მეხუთე სეზონით დაბრუნდეს! შეგახსენებთ, რომ 2022 წლის ნოემბერში HBO-მ განაცხადა, რომ შოუ აღარ გაგრძელდებოდა და 5-ის ნაცვლად, მეოთხე სეზონით დასრულდებოდა. მიუხედავად ამისა, სერიალის პროდიუსერი და სცენარისტი ჯონათან ნოლანი ამბობს, რომ Westworld-ის დასრულებას გეგმავს.

"დაწყებული პროექტის დასრულება მიყვარს. ინტერსტელარის დასამთავრებლად 8 წელი და რეჟისორის გამოცვლა დამჭირდა. Westworld-ით ძალიან ვამაყობ. მისი შექმნა საოცარი გამოცდილება იყო. ჩემი აზრით, შეცდომა იქნებოდა, უკან რომ მოგვეხედა და მხოლოდ გულდაწყვეტა გვეგრძნო იმის გამო, როგორც დამთავრდა. დღემდე ძალიან დიდი სურვილი გვაქვს, რომ ბოლომდე მივიყვანოთ", — ამბობს ნოლანი.

შოუ ძალიან საინტერესო ადგილას გაწყდა, რის გამოც მაყურებლებს თავიანთ საყვარელ პერსონაჟებთან დაკავშირებით უამრავი პასუხგაუცემელი კითხვა დარჩათ. სერიალში დოლორესის როლის შემსრულებელი, ევან რეიჩელ ვუდი, ამბობს, რომ შოუს შემქმნელებმა მასაც არ გაუმხილეს, რეალურად როგორ აპირებდნენ Westworld-ის დასრულებას.

"ვკითხე, როგორ უნდოდათ შოუს დამთავრება, მაგრამ არ მითხრეს. ვფიქრობ, ალბათ, იმიტომ, რომ მაინც აპირებენ რამე ფორმით გააგრძელონ. შოუს დასასრულთან დაკავშირებული კითხვები ღამეც კი მაღვიძებს ხოლმე", — აღნიშნავს მსახიობი.

ველური დასავლეთის სამყარო HBO-ს ერთ-ერთი ყველაზე ცნობილი სამეცნიერო ფანტასტიკის ჟანრის სერიალია. შოუს სიუჟეტი თემატური პარკის მცხოვრებების გარშემო ვითარდება, რომელთაც რეალურ სამყაროსთან მოუწევთ შეჯახება. სერიალიდან ვიგებთ, თუ როგორ ბედი შეიძლება ელოდეს კაცობრიობას ტექნოლოგიური განვითარების ეპოქაში და რა ეთიკური გამოწვევების წინაშე შეიძლება დავდგეთ.