რა ხდება: მოსამართლე გიორგი მიქაუტაძემ დედის ფულადი საჩუქრის წარმომავლობაზე საეჭვო ცნობა წარმოადგინა.

  • ინფორმაციას ორგანიზაცია საერთაშორისო გამჭვირვალობა - საქართველო (TI) ავრცელებს.

დეტალები: უზენაესი სასამართლოს მოსამართლის გიორგი მიქაუტაძის მიერ, მედიისთვის მიწოდებული ცნობა, რომელიც უნდა ადასტურებდეს დედამისის მიერ კონკრეტული კომპანიისგან მიღებულ შემოსავალს, შეუსაბამოა ამავე კომპანიის ოფიციალურ ფინანსურ ანგარიშებთან, აცხადებს TI.

პრობლემაა, რომ ორგანიზაციის მიერ შესწავლილი დოკუმენტის მიხედვით,

  • მიქაუტაძის დედა, დარეჯან თავართქილაძე, სს "ბახტრიონიდან" 2019 წლის თებერვლის შემდეგ დივიდენდის სახით თვეში 17,054.78 ლარს იღებს მაშინ, როდესაც კომპანიის ფინანსური ანგარიშების თანახმად, მას 2019-2022 წლებში დივიდენდის სახით 2.5 ჯერ ნაკლები, თვეში დაახლოებით 6,900 ლარი უნდა მიეღო.
  • კითხვები გიორგი მიქაუტაძის დედის შემოსავალთან დაკავშირებით გაჩნდა მას შემდეგ, რაც მოსამართლემ დაადეკლარირა, რომ 2022-2023 წლებში დედამ 150,000 აშშ დოლარი აჩუქა. "აღნიშნული რიცხვი გამოითვლება სს “ბახტრიონის” 2022, 2021, 2020, 2019 წლის ფინანსურ ანგარიშგებებში დაჯამებული დივიდენდების 4 წელზე და 12 თვეზე გაყოფით", — აკონკრეტებს ორგანიზაცია.

ფოტო: Declaration.ge

TI-ის განცხადებიდან: "ევროკომისიის რეკომენდაციის თანახმად, უზენაესი სასამართლოს მოსამართლე გიორგი მიქაუტაძე კეთილსინდისიერების შემოწმების მექანიზმს უნდა დაექვემდებაროს, რაც ევროკავშირში გაწევრიანებაზე მოლაპარაკებების დასაწყებად სასამართლოს გაჯანსაღების მიზნით გათვალისწინებული ერთ-ერთი წინაპირობაა. ამ მექანიზმის შემოღებას მიქაუტაძე სასამართლოს სხვა გავლენიან მოსამართლეებთან და ხელისუფლებასთან ერთად ეწინააღმდეგება."

რა გვახსოვს მიქაუტაძის შესახებ:

  • გიორგი მიქაუტაძის სახელთან არის დაკავშირებული მოსამართლეთა შერჩევა-დანიშვნის, უკონკურსოდ დაწინაურების, უზენაესი სასამართლოს მოსამართლეობის კანდიდატთა ე.წ. 10-კაციანი სიის ფორმირებასთან დაკავშირებით;
  • გიორგი მიქაუტაძის მდივნობის დროს ცნობილი გახდა, რომ წინა მდივნის პერიოდში, განადგურდა საბჭოს სერვერი და წაიშალა საბჭოს სხდომების არაერთი ჩანაწერი;
  • იუსტიციის უმაღლესი საბჭოს მდივნად არჩევიდან 7 თვეში, გიორგი მიქაუტაძის მეუღლე, მაია კვირიკაშვილი, თბილისის საქალაქო სასამართლოს მოსამართლედ დაინიშნა;
  • მოსამართლე ხვიჩა კიკილაშვილი, რომლის მიერ განხილულ საქმეში, გიორგი მიქაუტაძეს ჰქონდა დაზარალებულის სტატუსი, მალევე უვადოდ დაინიშნა მოსამართლის თანამდებობაზე ისე, რომ გიორგი მიქაუტაძე მონაწილეობდა მის გასაუბრებაში. სამოქალაქო საზოგადოების ორგანიზაციების კრიტიკის შემდეგ კენჭისყრის ეტაპზე, მან თვითაცილების საკითხი დააყენა.

ფართო სურათში: საქართველოში მოსამართლეთა კეთილსინდისიერების შემოწმების წინააღმდეგ არიან მიმართული მხოლოდ მმართველი პარტია ქართული ოცნება და სასამართლო სისტემის გავლენიანი პირები.

  • მათ რიგშია საქართველოს უზენაესი სასამართლოც, რომელმაც 11 მარტს გავრცელებულ განცხადებაში "შეშფოთება" გამოთქვა და განაცხადა, რომ კეთილსინდისიერების შემოწმება სასამართლოსა და მოსამართლეების დამოუკიდებლობას ლახავს; 24 მარტს კი, ამ განცხადებას მხარი დაუჭირა 295-მა მოსამართლემ, იუსტიციის უმაღლეს სკოლაში გამართულ საქართველოს მოსამართლეთა XXXII კონფერენციაზე.

რედაქციისგან: დაასრულებს თუ არა კეთილსინდისიერების შემოწმება სასამართლო კლანს