რა ხდება: აქტივისტმა ჯანსუჰ ადლეიბამ, აფხაზეთის თვითგამოცხადებული რესპუბლიკის პრეზიდენტის, ასლან ბჟანიას გადადგომის მოთხოვნით, შიმშილობა დაიწყო.

  • მისი შიმშილობის აქცია სოხუმში, თავისუფლების მოედანზე მიმდინარეობს.

ჯანსუჰ ადლეიბა: "ბჟანიას, მმართველობის ოთხი წელში არ შეუსრულებია არც ერთი პუნქტი საარჩევნო კამპანიიდან. რასაც აკეთებს, დამღუპველია ჩვენი ქვეყნისთვის. არ აქვს მორალური უფლება, იყოს ამ პოზიციაზე. მან წითელი ხაზი გადაკვეთა, ამას სახელმწიფო ღალატად მივიჩნევ."

რა ვიცით ჯანსუჰ ადლეიბას შესახებ: ასლან ბჟანიას აქტიური მეტოქეა ბოლო წლებში და სამთავრობო შენობებთან ხშირად აპროტესტებს სხვადასხვა საკითხებს.

  • ადელიბა შიმშილობდა მაშინაც, როდესაც ანტიკორუფციული კანონების გამკაცრებას მოითხოვდა; მისი მოთხოვნა იყო, შესრულებულიყო კორუფციასთან საბრძოლველად არსებული ნორმები.
  • ის, ასევე შიმშილობდა 2022 წლის ივნისშიც, მას შემდეგ, რაც უკრაინაში რუსეთის სრულმასშტაბიან ომს საწვავის ფასების 20%-იანი ზრდა მოჰყვა სოხუმში.
  • მაშინ ადლეიბამ შიმშილობა შეწყვიტა 18 დღის შემდეგ; მას ე.წ. პრეზიდენტის ადმინისტრაციის წარმომადგენლები დაჰპირდნენ, რომ საწვავის ფასების პრობლემას მომდევნო ორი კვირის განმავლობაში მოაგვარებენ.