მოემზადეთ უკვდავების სამყაროში დასაბრუნებლად — ინტერვიუ ვამპირთან მეორე სეზონით გრძელდება. ენ რაისის ბესტსელერი წიგნების სერიის მიხედვით გადაღებული სერიალის ახალი სეზონის პრემიერა 12 მაისს შედგება.

ტელეარხ AMC-ის გავრცელებული აღწერიდან და ტრეილერიდან ვიგებთ, რომ მეორე სეზონში მოვლენები კიდევ უფრო დრამატულად განვითარდება. მოქმედება ამჯერად 2022 წელს ხდება. ვამპირი ლუი თავისი ცხოვრების ისტორიას ჟურნალისტ დენიელ მოლოის მოუთხრობს: უყვება, როგორ ჩავიდა ძველი სამყაროს ვამპირების მოსაძებნად პარიზში, სადაც რაისის წიგნების კიდევ ერთი გმირი, არმანდი, გაიცნო და შეუყვარდა. სხვათა შორის, ვამპირის ქრონიკების წინა ეკრანიზაციისგან განსხვავებით, AMC-ის სერიალში ქვიარ ხაზი ნათლად ჩანს.

აღსანიშნავია, რომ როგორც წინა სეზონზე, ამჯერადაც სერიალის ერთ-ერთ რეჟისორად წარმოშობით ქართველი ლევან აკინი მოგვევლინება. აკინი, რომელიც საქართველოში ფილმით და ჩვენ ვიცეკვეთ გაიცნეს, ენ რაისის შემოქმედების დიდი გულშემატკივარიც ყოფილა.

"როცა 12 წლის წინ ახალ ორლეანში პირველად მოვხვდი, ენ რაისის ტურზე წავედი", — უყვება აკინი გამოცემა Variety-ს, — "მე მისი დიდი გულშემატკივარი ვარ — ამ წიგნებმა ჩემი ცხოვრება შეცვალა, მათით სულ სხვა სამყარო გავიცანი".

ქართველ-შვედი რეჟისორის თქმით, როცა გაიგო, რომ სერიალზე მუშაობა იწყებოდა, პროექტის ხელმძღვანელს, როლინ ჯოუნსს, დაუკავშირდა. ამ უკანასკნელს და ჩვენ ვიცეკვეთ ისე მოსწონებია, რომ აკინს რეჟისორის სკამი არგუნა. პირველ სეზონში ლევანმა შვიდიდან ორი სერია გადაიღო. უკვე ვიცით, რომ იგი სერიალის მეორე სეზონის მესამე და მეოთხე ეპიზოდების რეჟისორიც იქნება (ყველა სერიის რეჟისორის ვინაობა ჯერჯერობით არაა ცნობილი).

სანამ მაისი მოვა, ვამპირების სამყაროს მეორე სეზონის ტრეილერით შეგიძლიათ შეავლოთ თვალი.

ენ რაისის ჟანრის კლასიკად ქცეული რომანი, ინტერვიუ ვამპირთან, 1976 წელს გამოიცა. წიგნი 200 წლის ვამპირი ლუის შესახებ მოგვითხრობს, რომელიც თავის ცხოვრებაზე და მე-18 საუკუნის ახალ ორლეანში გატარებულ წლებზე ჟურნალისტს უყვება. რომანის მთავარი ანტაგონისტი, ლესტატ დე ლიონკური, მოგვიანებით ვამპირის ქრონიკების სერიის მთავარი გმირი გახდა.

სერია, რომელიც ჯამში 13 რომანს მოიცავს, მსოფლიოში 80 მილიონზე მეტ ეგზემპლარადაა გაყიდული. ის ლიტერატურაში ვამპირული და გოთიკური ჟანრების ფენომენად მიიჩნევა.

///

ინტერვიუ ვამპირთან გასული საუკუნის 90-იან წლებში ჰოლივუდში ბლოკბასტერ ფილმადაც აქციეს, სადაც მთავარი როლები ბრედ პიტმა, ტომ კრუზმა და ანტონიო ბანდერასმა შეასრულეს. 2002 წელს გადაიღეს რაისის კიდევ ერთი ვამპირული ისტორიის, დაწყევლილების დედოფლის, ეკრანიზაცია.

AMC-მ კი რაისის კიდევ ერთი ფენტეზი სერია, მეიფერის ჯადოქრები, გადაიღო სერიალად. ორივე სერიალში ვხვდებით გამოგონილ საიდუმლო საზოგადოებას, ტალამასკის ორდერს, რომელიც ვამპირების, ჯადოქრების, სულებისა და მაქციების ცხოვრებას იკვლევს. გასულ წელს გავიგეთ, რომ AMC სწორედ ტალამასკის ორდერზე იღებს ახალ სერიალს.