რა ხდება: საქართველოს პრემიერ-მინისტრი ირაკლი კობახიძე მედიასთან გაკეთებულ კომენტარში ამბობს, რომ დღეს, 19:00-ზე ორბელიანების სასახლეში არ მივა.

  • "ჩვენ იქ არც დაპატიჟებული ვართ და არც განიხილება ეს საკითხი", — თქვა მან, იმის მიუხედავად, რომ საქართველოს პრეზიდენტის ადმინისტრაციამ საჯაროდ განაცხადა თოფურიას დაჯილდოებაზე პრემიერ-მინისტრისა და პარლამენტის თავმჯდომარის მიწვევის შესახებ.

კონტექსტი: UFC-ის ჩემპიონს, ილია თოფურიას სალომე ზურაბიშვილი დღეს ღირსების ორდენს გადასცემს. სპორტსმენი ღირსების ორდენზე პრემიერ-მინისტრმა, ირაკლი კობახიძემ და პარლამენტის თავმჯდომარემ, შალვა პაპუაშვილმა წარადგინეს.

  • "პრეზიდენტი დაჯილდოების ცერემონიაზე პრემიერ-მინისტრს და პარლამენტის თავმჯდომარეს ეპატიჟება. სამივე შტოს მონაწილეობა, ამ ცერემონიაში, ასეთ საკითხებზე, ეროვნული თანხმობის ნიშანია", — ნათქვამია პრეზიდენტის ადმინისტრაციის განცხადებაში.

რა თქვა კობახიძემ: "იმისათვის, რომ ილია თოფურიას სათანადოდ დავუფასოთ ძალიან დიდი დამსახურება ჩვენი ქვეყნის წინაშე, რაც დიდი შრომითა და პატრიოტიზმით მოიპოვა, ჩვენთვის მნიშვნელოვანი იყო ამ აქტის განხორციელება. ამიტომ, მე და შალვა პაპუაშვილმა შესაბამისი წარდგინებით მივმართეთ საქართველოს პრეზიდენტს, სალომე ზურაბიშვილს. ილია თოფურიას დამსახურებას სჭირდება სათანადო დაფასება."

დეტალები: ჟურნალისტის კითხვაზე, აპირებს თუ არა პრემიერ-მინისტრი ორბელიანების სასახლეში მისვლას, კობახიძის პასუხია, რომ იქ დაპატიჟებულები არ არიან და მისვლა არც განიხილება: "ჩვენ გვქონდა ამ დღეების განმავლობაში ურთერთობა ილია თოფურიასთან, რაც ჩვენთვის ძალიან ძვირფასია, დანარჩენი ჩვენი საკითხი არ არის", — უპასუხა ჟურნალისტებს პრემიერ-მინისტრმა.

  • On.ge-მ სცადა საქართველოს პარლამენტში გაერკვია, აპირებს თუ არა პრეზიდენტის სასახლეში მისვლას პარლამენტის თავმჯდომარე, შალვა პაპუაშვილი, თუმცა, პასუხი ამ დრომდე არ მიგვიღია. მასალა მათი პასუხის შესაბამისად განახლდება.

ბოლო ხაზი: UFC-ის ჩემპიონი ილია თოფურია საქართველოში, პრემიერ-მინისტრ ირაკლი კობახიძის მოწვევით, 18 მარტს ჩამოვიდა.