მას შემდეგ, რაც იანვარში გაერთიანებული სამეფოს სამეფო ოჯახმა ცნობა გაავრცელა, პრინცესა ქეთრინმა გეგმიური ოპერაცია გაიკეთაო, ინტერნეტი კონსპირაციულმა თეორიებმა მოიცვა. კენსინგტონის სასახლის ცნობით, წარმატებით ჩავლილი ოპერაციის შემდეგ, უელსის პრინცესა ორი კვირით საავადმყოფოში დარჩებოდა და დროებით, აღდგომამდე, სამეფო მოვალეობებისგან გათავისუფლდებოდა.

მოარული ხმების გასაფანტავად, 10 მარტს, დედის დღეზე, კენსინგტონის სასახლემ ახალი ფოტო გამოაქვეყნა, რომელზეც ქეით მიდლტონი შვილებთან ერთადაა გამოსახული. სურათი მედიებმაც გაავრცელეს, მაგრამ მალევე მორიგი კონსპირაციული თეორია დაიბადა: ინტერნეტმომხმარებლები აღნიშნავდნენ, რომ სურათზე სხვადასხვა დეტალი — პრინცესა შარლოტის მკლავი და პრინცი ჯორჯის ხელი — შესაძლო ფოტომანიპულაციაზე მიუთითებდა. ამავე ბრალდებით, რამდენიმე ცნობილმა გამოცემამ ფოტო თავისი არხებიდან წაშალა და განაცხადა, რომ, მათი აზრით, ეს მართლაც ფოტომანიპულაცია იყო.

ამბავს მალევე გამოეხმაურა თავად უელსის პრინცესა. კენსინგტონის სასახლის განცხადებაში, პრინცესა ქეთრინმა ბოდიში მოიხადა და აღნიშნა, რომ ფოტო დამუშავებული იყო.

"როგორც ბევრი მოყვარული ფოტოგრაფი, ხანდახან მეც ვცდი ხოლმე სურათების დამუშავებას", — წერია განცხადებაში, — "მინდოდა, ბოდიში მომეხადა გუშინდელ ფოტოს მოყოლილი გაუგებრობის გამო".

მიუხედავად სამეფო ოჯახის მცდელობისა, გაეფანტათ კონსპირაციული თეორიები, დამუშავებული ფოტოს გამოქვეყნებამ კიდევ უფრო დიდი მითქმა-მოთქმა გამოიწვია. ზოგიერთი ინტერნეტმომხმარებელი ვარაუდობს, რომ ოჯახი პრინცესა ქეთრინის ჯანმრთელობის მდგომარეობას შეიძლება მალავდეს.