მოკლედ: მედიის ადვოკატირების კოალიცია ხელისუფლებას მოუწოდებს, 8 მარტს, ადიგენში, პოლიციის მხრიდან რეგიონული მედიის TOK TV-ს ჟურნალისტისთვის პროფესიული საქმიანობის განხორციელებაში უკანონოდ ხელის შეშლის ფაქტზე გამოძიება დაიწყოს.

  • "პროფესიული საქმიანობის განხორციელებისას მედიის წარმომადგენლებისთვის ხელის შეშლა სერიოზულ კითხვებს აჩენს ხელისუფლების მხრიდან საზოგადოების წინაშე ანგარიშვალდებულებასა და პრესის თავისუფლებასთან მიმართებით", — წერია განცხადებაში.

დეტალები: მედიის ადვოკატირების კოალიციის მიხედვით,

  • 8 მარტს TOK TV-მ გავრცელა ვიდეო, სადაც ჩანს თუ როგორ უშლიან ხელს პოლიციის წარმომადგენლები ჟურნალისტს ადიგენში მიმდინარე შეხვედრის გაშუქებაში, რომელსაც მერიისა და საპატრიარქოს წარმომადგენლები ესწრებოდნენ.
  • "მედია ცდილობდა, გაეგო თუ რა ხდებოდა მედრესესთან სადავო საკითხთან დაკავშირებით", — წერია კოალიციის განცხადებაში.

ბოლო ხაზი: 8 მარტს, ადიგენში, მართლმადიდებლებსა და მუსლიმებს შორის დაპირისპირების მიზეზი იუსუფ მიქელაძის სახლი გახდა, სადაც ბოლო წლებია ადიგენში მცხოვრები მუსლიმები იკრიბებიან და პარასკევის ლოცვას აღავლენენ.

  • ათობით პირი იუსუფ მიქელაძის სახლთან მივიდა და მუსლიმებს ლოცვის ჩატარების საშუალება არ მისცა.
  • საპროტესტო აქციის მონაწილეები ამბობდნენ, რომ სახლის, სადაც მედრესეა (მუსლიმანური სასწავლებელი), "მეჩეთად გადაქცევას" და იქ ყოველ პარასკევს ლოცვის ჩატარებას არ დაუშვებდნენ.

გაიგე მეტი: ადიგენში მომხდარი დაპირისპირების გამო, სახელმწიფოს მოუწოდებენ, დაიცვას რელიგიის თავისუფლება, თანასწორობა და სოციალური მშვიდობა