მოკლედ: საქართველოს პრეზიდენტი სალომე ზურაბიშვილი რუსული კანონის წინააღმდეგ, 7-8 მარტის საპროტესტო აქციების მონაწილე ახალგაზრდებს შეხვდა.

  • პრეზიდენტის ადმინისტრაციის მიხედვით, შეხვედრა 7 მარტს, ორბელიანების სასახლეში შედგა.

ფოტო: პრეზიდენტის ადმინისტრაცია

დეტალები: პრეზიდენტმა მადლობა გადაუხადა ახალგაზრდებს იმ სამოქალაქო აქტიურობისათვის, რომელმაც "თავისი სიტყვა უკვე თქვა და საქართველოს ისტორიაში ჩაიწერა" და აღნიშნა, რომ ისევე, როგორც გასული წელი, როცა ევროკომისიამ საქართველოს კანდიდატის სტატუსი მიანიჭა, მიმდინარე წელიც უმნიშვნელოვანესია, რადგან ქვეყანაში საპარლამენტო არჩევნები ტარდება.

  • პრეზიდენტის განცხადებით, ბევრად მნიშვნელოვანი იქნება ახალგაზრდების ჩართულობა, არჩევნებზე მისვლა და არჩევნებში მონაწილეობისათვის მობილიზება, რადგან "როგორც წესი, ყველგან და ამაში გამონაკლისი არც საქართველოა, არჩევნებში, ზოგადად, ახალგაზრდების დაბალი აქტივობა ფიქსირდება".
  • "თქვენი პასუხისმგებლობაა, ეს გზავნილი მიიტანოთ სხვა ახალგაზრდებამდე და იმ ადამიანებამდე, ვინც დღეს საზღვარგარეთ სწავლობს და მუშაობს, რომ ამ საარჩევნო პროცესში მათი ხმა, თქვენს ხმასთან ერთად, ძალიან მნიშვნელოვანია", — განაცხადა სალომე ზურაბიშვილმა.

ფოტო: პრეზიდენტის ადმინისტრაცია

ბოლო ხაზი: 2023 წლის 7-8 მარტს საზოგადოება პარლამენტის წინ რუსულ კანონს აპროტესტებდა.

  • სამართალდამცველებმა შეკრებილები რამდენჯერმე დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით.
  • საზოგადოების პროტესტის შედეგად, საპარლამენტო უმრავლესობამ რუსული კანონი, მეორე მოსმენისას, ჩააგდო.

გაიგე მეტი: თუ პრეზიდენტის ტელეინტერვიუ ვერ ნახეთ — აქ არის ძირითადი აქცენტები ჟურნალისტებთან შეხვედრიდან