მთავარი პროკურორის, ირაკლი შოთაძის განცხადებით, მათ ორჯერ გააგზავნეს უკრაინაში, ყოფილი პრეზიდენტის, მიხეილ სააკაშვილის ექსტრადირების მოთხოვნა, თუმცა, უარი მიიღეს. მისი თქმით, სამართლებრივად, ამის შემაფერხებელი გარემოება უკრაინის კონსტიტუციაა:

"ჩვენ ვთანამშრომლობთ ჩვენს კოლეგებთან, უკრაინის გენერალურ პროკურატურასთან საკმაოდ აქტიურად, თუმცა დღესდღეობით შემაფერხებელი გარემოება მისი ექსტრადირების საქართველოში სამართლებრივად არის მათი კონსტიტუცის დათქმა, რომლის თანახმად, უკრაინის მოქალაქის ექსტრადირება არ შეიძლება. მაგრამ, ჩვენ ვმუშაობთ ამ საკითხზე".

შოთაძის თქმით, ექსტრადიციის საკითხზე უკრაინას ბოლოს 2015 წელს მიმართეს:

"გაგზავნილია შესაბამისი გზავნილები, რომლის მიხედვით ყოფილ პრეზიდენტს ბრალი აქვს შერაცხული".

2015 წლის პირველ აპრილს, უკრაინის გენერალურმა პროკურატურამ განცხადება გაავრცელა, სადაც ნათქვამია, რომ მიხეილ სააკაშვილის ექსტრადაციით არსებობდა რისკი, რომ სააკაშვილის ექსტრადიციის თხოვნის უკან პოლიტიკური დევნის სურვილი იყო. ამის შემდეგ, 2015 წლის 30 მაისს, მიხეილ სააკაშვილმა უკრაინის მოქალაქეობა მიიღო.