როგორც იქნა, გაზაფხულიც დადგა. ზამთრის გადაგორებასთან ერთად, ისიც გვიხარია, რომ ასე ნანატრი პრემიერების თარიღები მოახლოვდა. საინტერესო ფილმები კი ამ სეზონზე ნამდვილად მოგვაკლდება. გაზაფხულზე ბევრჯერ გადადებულ-გადმოდებული პრემიერების თარიღებმაც მოიყარა თავი და რომელიმე რომ არ გამოგრჩეს, ტრადიციულად, საგანგებო გზამკვლევი მოგიმზადეთ.

აი, რომელ ახალ ფილმებს შეძლებ უყურო უახლოეს თვეებში:

დიუნი: მეორე ნაწილი / Dune: Part 2

ფრენკ ჰერბერტის ეპიკური საი-ფაი საგის ეკრანიზაცია წლის ერთ-ერთი უდიდესი კინომოვლენაა. დენი ვილნევის დიუნის პირველ ნაწილს, რომელიც მაყურებელმა 2021 წელს იხილა, კრიტიკოსების აღფრთოვანებული გამოხმაურება და დიდი კომერციული წარმატება ხვდა წილად, ასე რომ, რეჟისორმა მისი გაგრძელება განიზრახა. ფილმის მეორე ნაწილი დიუნის პირველი წიგნის მეორე ნახევრის ადაპტაციაა.

ნაცნობ სახეებთან ერთად, დიუნის მეორე ნაწილში ახალ ვარსკვლავებსაც ვიხილავთ. მათ შორისაა კრისტოფერ უოლკენი, რომელიც იმპერატორისა და ამბის მთავარი ანტიგმირის როლს მოირგებს. ფილმის ვარსკვლავურ სამსახიობო შემადგენლობაში არიან ოსტინ ბატლერი და ლეა სეიდუც.

პრემიერის თარიღი საქართველოში: 29 თებერვალი

სიყვარული სისხლისგან იცლება / Love Lies Bleeding

გაზაფხული ქვიარ თემატიკის ფილმების მოყვარულებისთვისაც საინტერესო იქნება. სიყვარული სისხლისგან იცლება ახალი რომანტიკული თრილერია, რომელშიც მთავარ როლებს კრისტენ სტიუარტი და კეტი ო'ბრაიენი ასრულებენ. სიუჟეტი კი 1980-იან წლებში ვითარდება: სტიუარტის პერსონაჟს, სავარჯიშო დარბაზის ინსტრუქტორ ლუს, ბოდიბილდერი ჯეკი უყვარდება. თუმცა, ამ ურთიერთობისთვის დაბრკოლებად იქცევა ლუს კრიმინალური ოჯახი, რომელიც ორივეს სახიფათო თამაშში ჩაითრევს.

პრემიერის თარიღი: 8 მარტი

კუნგ-ფუ პანდა 4 / Kung Fu Panda 4

თუ ანიმაციები გიყვარს, არც შენ დარჩები ამ სეზონზე გაწბილებული, რადგან ლეგენდარული კუნგ-ფუ პანდა მეოთხე ფილმით ბრუნდება. კუნგ-ფუ პანდა 4-ში პო ემზადება, რომ დრაკონის მებრძოლის როლი დათმოს და სულიერი წინამძღოლი გახდეს, მაგრამ ამისთვის ჯერ მას თავისი მემკვიდრე მელას გაწვრთნა მოუწევს. მელას როლს მსახიობი და რეპერი Awkwafina გაახმოვანებს.

ფილმში პერსონაჟებს ასევე ახმოვანებენ ჯეკი ჩანი, ვაიოლა დევისი და სხვა ცნობილი მსახიობები. კომპანია DreamWorks-მა ტრილოგია 2016 წელს Kung Fu Panda 3-ით დაასრულა, ამის შემდეგ კი ნეტფლიქსზე იმავე პერსონაჟებზე გადაღებული ანიმაციური სერიალიც ვიხილეთ.

პრემიერის თარიღი საქართველოში: 7 მარტი

///

გამოგონილი / Imaginary

ამ სეზონზე ფილმების ჟანრობრივი მრავალფეროვნების ნაკლებობას ნამდვილად არ ვუჩივით: ჯერ მხოლოდ მარტის პრემიერებზე გიყვებით და უკვე ჰორორ ფილმსაც წარმოგიდგენთ; გამოგონილი, ერთი შეხედვით, საშინელებათა ჟანრის კლასიკურ ფაბულას მიჰყვება: ახალგაზრდა ქალი, ჯესიკა, ბავშვობისდროინდელ სახლში ოჯახთან ერთად ბრუნდება და თავის ძველ სათამაშო დათუნიას აღმოაჩენს, რომელსაც მისი უმცროსი შვილი, ელისი, უმეგობრდება. ელისის ქცევის ცვლილებისა და დათუნიასთან უცნაური თამაშების გამართვის შემდეგ, ჯესიკა ხვდება, რომ მისი ძველი სათამაშო მთელი ეს ხანი საიდუმლოს მალავდა.

პრემიერის თარიღი: 8 მარტი

ახალგაზრდა ქალი / Damsel

აი, კიდევ ერთი ჟანრობრივად განსხვავებული ფილმი მარტში. ახალგაზრდა ქალი, რომელშიც მთავარ როლს Stranger Things-ის ვარსკვლავი მილი ბობი ბრაუნი ასრულებს, ნეტფლიქსის ბნელი ფენტეზის ჟანრის ახალი ფილმია. ის გვიყვება არისტოკრატ გოგოზე, ელოდიზე, რომელიც პრინცზე დაქორწინების შემდეგ აღმოაჩენს, რომ ამ უკანასკნელს ის მხოლოდ დრაკონისთვის შესაწირად სჭირდებოდა. ეს ამბავი საუკუნეების განმავლობაში გრძელდებოდა: სამეფო ახალგაზრდა ქალებს დრაკონს სწირავდა, რათა სახელმწიფო ურჩხულისგან ეხსნა. ქორწილის შემდეგ ელოდიც ამ ქალების ბედს გაიზიარებს და უფსკრულში აღმოჩნდება, მაგრამ პრინცესა გადაწყვეტს, ურჩხულს თავადვე შეებრძოლოს.

პრემიერის თარიღი: 8 მარტი

უმწიკვლო / Immaculate

საშინელებათა ჟანრის ამ ახალ ფილმში სიდნი სვინი ორსული მონაზვნის როლში გვევლინება. მისი პერსონაჟი, ღრმად მორწმუნე სესილია, იტალიის ერთ-ერთ ცნობილ მონასტერში ხვდება და მალევე აღმოაჩენს, რომ ნაგებობა ბნელ საიდუმლოებებს მალავს. სესილიას უწევს, იბრძოლოს, რათა იდუმალებით მოცულ მონასტერსა და სასწაულებრივ ორსულობას გადაურჩეს.

პრემიერის თარიღი საქართველოში: 21 მარტი

დედის ინსტინქტი / Mothers' Instinct

დედის ინსტინქტი ფრანგი ბენუა დელომისთვის სარეჟისორო დებიუტია. ფსიქოლოგიური თრილერის ჟანრის ფილმი ოლივიე მასე-დეპასის ამავე სახელწოდების ფრანგულენოვანი კინოსურათის "რიმეიკია", ორივე მათგანი კი ბელგიელი მწერლის, ბარბარა აბელის, რომანის ეკრანიზაცია გახლავს.

დედის ინსტინქტში მოქმედება 1960-იან წლებში ვითარდება, ამბავი კი ორ მეგობარსა და მეზობელზე, ელისსა და სელინზე, გვიყვება. მათ იდილიურ ყოველდღიურობას მოულოდნელი უბედურება ცვლის, რომელიც ერთ-ერთი მათგანის შვილს შეემთხვევა, ტრაგედიას მოყოლილი პარანოია და დანაშაულის შეგრძნება კი ოჯახებს შორის მეგობრობაში ბზარს აჩენს. ფილმში მთავარ როლებს ოსკაროსანი მსახიობები, ენ ჰეთეუეი და ჯესიკა ჩესტეინი, ასრულებენ.

პრემიერის თარიღი: 27 მარტი (გაერთიანებულ სამეფოში)

წყვდიადში დაბრუნება / Back to Black

Back to Black ცნობილ ინგლისელ მომღერალზე, ემი ვაინჰაუსზე, გადაღებული ბიოგრაფიული ფილმია. კინოსურათის სახელწოდება ვაინჰაუსის ერთ-ერთი ჰიტიდანაა აღებული. მასში მთავარ როლს მარისა აბელა ასრულებს, რეჟისორი კი სემ ტეილორ-ჯონსონი გახლავს. როგორც ფილმის ანოტაციიდან ვიგებთ, Back to Black "აქამდე უცნობი მხრიდან გვანახებს ვაინჰაუსის პოპულარობის ადრეულ ეტაპს და რევოლუციური სტუდიური ალბომის გამოშვებას".

"ამბავი ემის პერსპექტივიდანაა მოყოლილი, ფილმი კი შეულამაზებლად გვაჩვენებს ფენომენად ქცეულ ქალს და მის ურთიერთობას, რომელიც ყველა დროის ერთ-ერთ ყველაზე ლეგენდარულ ალბომს დაედო საფუძვლად".

პრემიერის თარიღი: 12 აპრილი (გაერთიანებულ სამეფოში)

პრეტენდენტები / Challengers

პრეტენდენტები რომანტიკულ-კომედიური დრამაა, რომელშიც მთავარ როლს ზენდეია ასრულებს. მსახიობი აღიარებულ ჩოგბურთელს, ტაში დანკანს, განასახიერებს, რომელიც მძიმე ტრავმის მერე იძულებული ხდება, მოთამაშის კარიერა დაასრულოს და მწვრთნელობას დასჯერდეს. დრამატული სიუჟეტი მაშინ იწყება, როცა ტაში თავის ქმარს, ჩემპიონ არტ დონალდსონს, კარიერის წარუმატებელი ეპიზოდის დასრულებისკენ უბიძგებს და გზავნის ტურნირზე, სადაც ამ უკანასკნელს თავის ყოფილ მეგობართან და ცოლის ყოფილ შეყვარებულთან დაპირისპირება მოუწევს.

პრემიერის თარიღი: 26 აპრილი

///

განტევების ვაცი / The Fall Guy

ესეც მორიგი კომედია: განტევების ვაცი 1980-იანებში გადაღებული ამავე სახელწოდების სერიალის კინოადაპტაციაა. ფილმში მთავარ როლებს რაიან გოსლინგი და ემილი ბლანტი ასრულებენ, ამბავი კი კოლტ სივერსის გარშემო ვითარდება, რომელიც თავისი ყოფილი შეყვარებულის ფილმში ერთ-ერთი მსახიობის დუბლიორს თამაშობს. სიტუაცია მაშინ იძაბება, როდესაც მთავარი როლის შემსრულებელი უჩინარდება, ემილი ბლანტის პერსონაჟი კი სივერსს მის მოძებნას სთხოვს.

პრემიერის თარიღი: 3 მაისი

მაიმუნების პლანეტის სამეფო / Kingdom of the Planet of the Apes

მაიმუნების პლანეტის სამეფო სერიის მეოთხე და ცნობილი ფრენჩაიზის მეათე ფილმია. ის გაგრძელებაა 2017 წელს გამოსული ფილმისა ომი მაიმუნების პლანეტაზე; მოქმედება კი ამ უკანასკნელში მოთხრობილი ამბიდან 300 წლის შემდეგ ვითარდება: ადამიანები ველურ არსებებად ქცეულან, მაიმუნთა ცივილიზაციები კი ოაზისიდან ისევ იწყებენ აღზევებას. მაიმუნების პლანეტის სამეფოს მთავარი გმირი ახალგაზრდა შიმპანზე ნოაა, რომელიც ადამიანთან ერთად იწყებს სახიფათო მოგზაურობას.

პრემიერის თარიღი: 10 მაისი

წმ / IF

წმ ჯონ კრასინსკის ფენტეზი კომედიაა, რომელშიც თავადაც მონაწილეობს რაიან რეინოლდსთან და კაილი ფლემინგთან ერთად. ფლემინგის პერსონაჟი, ბი, ტრავმული გამოცდილებების შემდეგ განსაკუთრებულ სუპერძალას შეიძენს — ის ზრდასრულების მიერ დავიწყებულ წარმოსახვით მეგობრებს (წმ-ებს) ხედავს. მოგვიანებით იგი იგებს, რომ მის მეზობელსაც აქვს მსგავსი სუპერძალა. საერთო შესაძლებლობების მქონე ბეა და მისი მეზობელი გადაწყვეტენ, ბავშვები და მათი წარმოსახვითი მეგობრები ერთმანეთს ისევ შეახვედრონ.

პრემიერის თარიღი: 17 მაისი

ფურიოსა: შეშლილი მაქსის საგა / Furiosa: A Mad Max Saga

პოსტაპოკალიფსური ჟანრის ეს ახალი ფილმი, რომელსაც გაზაფხულის მიწურულს ვიხილავთ, შეშლილი მაქსის ფრენჩაიზის მეხუთე ფილმია. ის 2015 წელს გამოსული შეშლილი მაქსი: მრისხანების გზის ერთგვარი წინაისტორიაა, სადაც ვეცნობით, როგორ გაიტაცეს ფურიოსა ბავშვობაში, რის შემდეგაც იგი ცხოვრების მთავარ მიზნად შინ დაბრუნებას ისახავს.

წინა ფილმში ამ პერსონაჟის როლს შარლიზ ტერონი ასრულებდა, ამჯერად კი ფურიოსას ანია ტეილორ-ჯოი განასახიერებს. ფილმში ასევე კრის ჰემსვორტი თამაშობს.

პრემიერის თარიღი: 23 მაისი

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...

ამავე თემაზე: