რა ხდება: თბილისის მერი კახა კალაძე ამბობს, რომ ტაქსის მძღოლებს შესაბამისი დრო ჰქონდათ განსაზღვრული იმისთვის, რომ კატეგორია აერჩიათ და მუნიციპალიტეტის მიერ დადგენილი შეღავათით ესარგებლათ.

  • ამით კალაძე პასუხობს B კატეგორიის ტაქსის მძღოლების მიერ გამოთქმულ პროტესტს, რომელიც A კატეგორიის ტაქსების მსგავსად, საავტობუსო ზოლში მოძრაობის უფლების მინიჭებას ეხება.

კონტექსტი: ტაქსის მძღოლების ნაწილმა საპროტესტო აქცია გასულ კვირას გამართეს. "გარ­კვე­უ­ლი კა­ტე­გო­რი­ის მან­ქა­ნებს ბას­ლეინ­ზე სიარულის უფლება აქვთ, ჩვენ, ვი­საც B კა­ტე­გო­რია გვაქვს, ბას­ლეინს ვერ ვკვეთთ", — თქვა ერთ-ერთმა შეკრებილთაგან და ტარიფებთან დაკავშირებული პრობლემის შესახებაც ისაუბრა.

რას ამბობს კალაძე: მერის თქმით, რეგულაციები უკვე დაწესებულია და ტაქსის მძღოლებს ჰქონდათ "უამრავი დრო და შესაძლებლობა", რომ აეღოთ ტაქსის ის ლიცენზია, რომელიც მათთვის და ზოგადად, ბიზნესისთვის იქნებოდა მნიშვნელოვანი: "ამასთან დაკავშირებით, არაერთი განმარტება გაგვიკეთებია. მომავალში კიდევ გვაქვს დაგეგმილი გარკვეული ცვლილებები, სიახლეების შემოტანა, რაც, ვფიქრობ, ამ სფეროში დასაქმებული ადამიანებისთვის და ბიზნესის წარმომადგენლებისთვის მნიშვნელოვანი იქნება", — განაცხადა მან.

ვისთვის არის ნებადართული ბასლეინის გამოყენება: როგორც თბილისის მერმა აღნიშნა, ავტობუსის ზოლში მოძრაობის უფლება, გარდა საზოგადოებრივი ტრანსპორტისა, აქვს

  • სახანძრო,
  • სამაშველო,
  • სასწრაფო და საპატრულო პოლიციის ავტომანქანებს (როცა ჩართული აქვთ შესაბამისი ციმციმა).
  • ასევე, ავტობუსის ზოლში გადაადგილება შეუძლიათ სასკოლო ავტობუსებს და მხოლოდ A კატეგორიის ტაქსების გარკვეულ ნაწილს მგზავრის აყვანა-ჩამოსმის მომენტში, თუ ამ დროს ხელს არ უშლიან ამავე ზოლში მოძრავ საზოგადოებრივ ტრანსპორტს.

"იმისთვის რომ A კატეგორიის, თეთრი ფერის ტაქსი გადაადგილდეს საავტობუსო ზოლში, ავტომანქანის ასაკი არ უნდა აღემატებოდეს 10 წელს. აღნიშნული ცვლილება ძალაში შევიდა 2023 წლის პირველი ივნისიდან, იმ ტაქსების რაოდენობა კი, რომლებიც აღნიშნულ კრიტერიუმებს აკმაყოფილებენ, თბილისში 3 500-ია", — თქვა კალაძემ.