რა ხდება: უკრაინული მედიის, hromadske-ს თანახმად, უკრაინის თავდაცვის სამინისტროს დაზვერვის მთავარი სამმართველოს ხელმძღვანელმა, კირილო ბუდანოვმა განაცხადა, რომ რუსი ოპოზიციონერი პოლიტიკოსი, ალექსეი ნავალნი, ბუნებრივი სიკვდილით გარდაიცვალა "სისხლის შედედების გამო".

  • ამის შესახებ მან კომენტარი ჟურნალისტის მიერ დასმული შეკითხვის საპასუხოდ გააკეთა კონფერენციაზე, სახელწოდებით — უკრაინა. 2024 წელი.
  • ბუდანოვს სხვა დეტალებზე არ უსაუბრია.

რა თქვა ბუდანოვმა: "შეიძლება, იმედები გაგიცრუოთ, მაგრამ რაც ვიცით, არის ის, რომ ის მართლაც თრომბის შედეგად გარდაიცვალა. ეს, მეტ-ნაკლებად, დადასტურებულია."

წინაისტორია: ალექსეი ნავალნის გარდაცვალების გამომწვევ იმავე მიზეზზე წერდა კრემლის პროპაგანდისტული რაშა თუდეი (RT) მალევე მას შემდეგ, რაც რუსეთის სასჯელაღსრულების სამინისტრომ ნავალნის სიკვდილის თაობაზე განაცხადა.

  • 2024 წლის 16 თებერვალს კოლონიამ, რომელშიც ის სასჯელს იხდიდა, პატიმრის გარდაცვალების შესახებ გაავრცელა ცნობა.
  • ისინი ამტკიცებენ, რომ ნავალნიმ თავი ცუდად იგრძნო გასეირნების შემდეგ და თითქმის მაშინვე დაკარგა გონება. ექიმებმა კი, მისი დახმარება ვერ შეძლეს.
  • უკრაინის პრეზიდენტმა ვოლოდიმირ ზელენსკიმ თქვა, რომ ნავალნი "აშკარად პუტინმა მოკლა".
  • NATO-ში განაცახადეს, რომ ნავალნის გარდაცვალებასთან დაკავშირებით, ყველა ფაქტი უნდა დადგინდეს.
  • ევროკომისიამ პოლიტიკოსის გარდაცვალებას უწოდა "საშინელი შეხსენება იმისა, თუ რა არის პუტინი და მისი რეჟიმი."

გაიგე მეტი: 2024 წლის 24 თებერვალს ალექსეი ნავალნის ცხედარი დედას გადაეცა