საქართველოს სავაჭრო-სამრეწველო პალატა საქართველო-უკრაინის ბიზნეს-ფორუმზე, მთავარ ბანერზე ქვეყნის დასახელების შეცდომით დაბეჭდვისთვის ბოდიშს იხდის.

ფოტო: სავაჭრო-სამრეწველო პალატა

საქართველო-უკრაინის ბიზნეს-ფორუმი დღეს, 18 ივლისს, თბილისში გაიმართა. ღონისძიებაზე დარბაზში განთავსებულ ერთ-ერთ ნაბეჭდ სტენდზე უკრაინულ ენაზე ქვეყნის დასახელება იყო შეცდომით დაბეჭდილი. (კერძოდ: Укaраїна; Україна-ს ნაცვლად).

"მიზეზი დაშვებული ტექნიკური შეცდომაა, რისთვისაც საქართველოს სავაჭრო-სამრეწველო პალატა, როგორც ღონისძიების ერთ-ერთი ორგანიზატორი ბოდიშს უხდის უკრაინულ დელეგაციასა და ფორუმის სხვა საპატიო სტუმრებს."

ფორუმში 120 ქართული და 34 უკრაინული კომპანიის წარმომადგენლები მონაწილეობდნენ. ღონისძიებაზე საქართველოსა და უკრაინის საინვესტიციო გარემო, ტურისტული პოტენციალი და საპარტნიორო ფონდის პროექტები განიხილეს.