საქართველოს პარლამენტის დეპუტატი, პატრიოტთა ალიანსის წევრი, ემზარ კვიციანი ფიქრობს, რომ მილიარდერი ფილანთროპი, ჯორჯ სოროსი მსოფლიოში თავისი გავლენის გასაზრდელად ვანო ჯავახიშვილის მოკვლას გეგმავს. კვიციანი ჟურნალისტის, გიორგი სანაიას გარდაცვალებასაც სოროსს უკავშირებს და წერს, რომ ის საქართველოს ამჟამინდელი და ბოლო 25 წლის მტერია. ამ შინაარსის ინფორმაცია ფეისბუკზე ემზარ კვიციანის სახელით ვრცელდება.

"საქართველო ისევ მათ საჯირითო ველად იქცევა! ამიტომ ვაფრთხილებ სპეცსამსახურებს და კერძოდ, იმ სავარაუდო მკვლელს, რომელიც მიჩენილია რუსთავი 2-ის თვალყურისთვის, როცა ბრძანებას მიიღებ, ეს ბრძანება იქნება უკანონო და არ შეასრულო, უბრალოდ, გამოდი და ამხილე ვინც შეგიკვეთა! პირობას გაძლევ, რომ ყველა პატრიოტი გვერდში დაგიდგებით და დაგიცავთ! ყველამ იქ, იმ ადგილზე ვიზრუნოთ ჩვენს ქვეყანაზე, სადაც ვართ და აუცილებლად გავიმარჯვებთ! დიდება ღმერთს!!!" - წერს კვიციანი.

ემზარ კვიციანის სტატუსს, ასევე ფეისბუკზე, გამოეხმაურა რუსთავი 2-ის გენერალური დირექტორი ნიკა გვარამიაც, რომელიც ხელისუფლებას რეაგირებას მოსთხოვს. როგორც გვარამია On.ge-სთან განმარტავს, კვიციანის ფეისბუკ სტატუსი საფრთხის შემცველია და ირიბი მუქარაა:

"რუსებზე, თუ ვიღაც აგენტებზე რეფერენსის გაკეთება სრული სისულელე და ბოდვაა, გასაგებია ვისაც აქვს ეს სურვილები. ემზარ კვიციანი პირველად არ არის შემჩნეული ძალადობრივ სცენებში მონაწილეობაში, ის არის რუსული ძალის წარმომადგენელი და ამავდროულად არის ხელისუფლების სატელიტი. ამიტომ, ჩვენ მოვითხოვთ, რომ ჩვენი თანამშრომელი, რომელიც ცნობილია თავისი ძალიან მწვავე შეფასებებით რუსეთთან და ხელისუფლებასთან მიმართებით, ასევე, იგი ერთ-ერთი ყველაზე პოპულარული და ყველაზე რეიტინგული ტელესახეა, მოვითხოვთ ის იყოს ადეკვატურად დაცული."

On.ge ცდილობს დაუკავშირდეს პარლამენტარ ემზარ კვიციანს და გაარკვიოს, საიდან იცის მან ვანო ჯავახიშვილის მოსალოდნელი ლიკვიდაციის შესახებ.