რა ხდება: სომხეთის თავდაცვის სამინისტროს ცნობით, აზერბაიჯანის შეიარაღებული ძალების ქვედანაყოფებმა 13 თებერვალს, დაახლოებით, 05:30 საათზე, ცეცხლი გაუხსნეს ნერქინ-ჰანდის რეგიონში მდებარე სომხურ სამხედრო ბაზას.

  • ნერქინ-ჰანდი არის სოფელი სომხეთის უკიდურეს სამხრეთში.

სომხეთის პოზიცია: "აზერბაიჯანის შეიარაღებული ძალების მიერ, ნერქინ-ჰანდის მიმართულებით გასროლის შედეგად, სომხურ მხარეს, წინასწარი მონაცემებით, ორი დაღუპული და დაჭრილი ჰყავს", — ნათქვამია სომხეთის თავდაცვის სამინისტროს განცხადებაში.

აზერბაიჯანის პოზიცია: ამის საპირისპიროდ, ბაქო ირწმუნება, რომ 12 თებერვალს, 20:50 საათსა და 23:40 საათზე, სომხეთის შეიარაღებული ძალების ქვედანაყოფებმა ცეცხლი გაუხსნეს აზერბაიჯანის არმიას. გარდა ამისა, აზერბაიჯანული მედია წერს "ორი სომეხი სამხედრო მოსამსახურის ლიკვიდაციის შესახებ", რომლებმაც "დაარღვიეს ზავი და პროვოკაციას ცდილობდნენ".

  • "სომხური მხარის ეს პროვოკაცია სერიოზულ დარტყმას აყენებს სამშვიდობო პროცესს აზერბაიჯანსა და სომხეთს შორის. ბოლო 4-5 თვის სტაბილურობის პირობებში, მსგავსი პროვოკაციული ქმედებები აშკარად ეწინააღმდეგება სომხეთის გაცხადებულ სამშვიდობო გზავნილებს", — აცხადებს აზერბაიჯანის საგარეო საქმეთა სამინისტრო.

ბოლო ხაზი: სომხეთისა და აზერბაიჯანის საზღვარზე ვითარება ბოლო თვეების განმავლობაში პირველად გაუარესდა.