რა ხდება: "ბუნებაში ვერ ნახავთ ვერცერთ ფაქტს, რომ კახა კალაძეს რაიმე კანონსაწინააღმდეგო ჩაედინოს", — კალაძის პრესსამსახურის მიხედვით, ამის შესახებ მან მედიის კითხვის საპასუხოდ განაცხადა.

  • "ჟურნალისტის კითხვის თანახმადაც, ერთ-ერთი დაკავებული მებაჟე საკუთარ ჩვენებაში ჰყვება, რომ კახა კალაძეს სამშენებლო ბიზნესში ფინანსური ინტერესები აქვს და ტვირთებზე, რომელიც ქვეყანაში შემოდის, საბაჟო დოკუმენტების ფალსიფიცირება ხდება", — აცხადებს თბილისის მერიის პრესსამსახური.

დეტალები: "მცდელობა გაქვთ, სისულელეები გაავრცელოთ, სულ სპეკულაციებში და ინტრიგებში ხართ. მე ვაყალბებ დოკუმენტაციას? ამ სისულელეებს შეეშვით, ჩემი თხოვნა იქნება", — განაცხადა კახა კალაძემ.

  • მერიის პრესსამსახურის მიხედვით, კითხვაზე — ჰქონდა თუ არა საგამოძიებო უწყებებს მასთან რაიმე სახის კითხვები, თბილისის მერი პასუხობს, რომ მისი ცხოვრების არცერთ ეტაპზე, არც სპორტში და არც პოლიტიკაში ყოფნის დროს, მსგავს ფაქტს ადგილი არ ჰქონია
  • "არა, არასდროს. კიდევ ერთხელ ვიმეორებ, ვერ ნახავთ ვერცერთ ფაქტს, ბუნებაში არ არსებობს, რომ კახა კალაძეს რაიმე კანონსაწინააღმდეგო ჩაედინოს ოდესმე, ვერ ნახავთ უბრალოდ მსგავს ფაქტს, რადგან არ არსებობს.
  • სად უნდა ეძებოთ ასეთი ადამიანები, მაგასაც მიგასწავლით, რომელ კონკრეტულ პოლიტიკურ პარტიაში და ა.შ.", — აღნიშნა დედაქალაქის მერმა.

ბოლო ხაზი: სამშენებლო ბიზნესში ფინანსური ინტერესების შესახებ, შესაბამისი შეკითხვა კახა კალაძეს ტელეკომპანია პირველმა დაუსვა.