მოკლედ: მოსკოვმა, იარაღის მიწოდების სანაცვლოდ, განბლოკა ჩრდილოეთ კორეის მილიონობით დოლარის გაყინული აქტივები და დაეხმარა მას საბანკო ქსელებზე წვდომაში.

ამასთან, ჩრდილოეთ კორეის სანქციების გვერდით ავლისთვის, შესაძლოა, ოკუპირებულ ცხინვალს იყენებდნენ.

  • ამის შესახებ ეხო კავკაზა ამერიკულ მედიაზე დაყრდნობით წერს.

დეტალები: დასავლური დაზვერვის წყაროების ცნობით, საუბარია მინიმუმ 9 მილიონ დოლარზე, ჩრდილოეთ კორეის 30 მილიონის აქტივიდან, რომელიც მთელი ამ ხნის განმავლობაში გაყინული იყო რუსეთის ფინანსურ ინსტიტუტებში, გაეროს სანქციების ფარგლებში.

  • ანალიტიკოსები ვარაუდობენ, რომ ფხენიანი ამ თანხებს, სავარაუდოდ, ნავთობის შესაძენად გამოიყენებს.
  • გარდა ამისა, დასავლური სადაზვერვო სამსახურების თანახმად, მოსკოვი იყენებს თვითგამოცხადებულ სამხრეთ ოსეთს, რათა დაეხმაროს ჩრდილოეთ კორეას სანქციების გვერდის ავლაში.
  • "ახალი საბანკო ანგარიში გაიხსნა სამხრეთ ოსეთში, თვითგამოცხადებულ სახელმწიფოში კავკასიის რეგიონში, რომელსაც მჭიდრო კავშირები აქვს რუსეთთან", — განაცხადეს ოფიციალურმა პირებმა, დაზვერვის ინფორმაციის სენსიტიურობის გამო მათ ანონიმურობის პირობით ისაუბრეს.

ამავდროულად, მოსკოვი მიუღებლად მიიჩნევს, დასავლეთში გაყინული მათი აქტივების გამოყენებას, უკრაინის დასახმარებლად. კრემლში მოვლენების ასეთ განვითარებას, რომელიც სულ უფრო ხშირად განიხილება შეერთებულ შტატებსა და ევროპაში, უაღრესად საშიშ პრეცედენტს უწოდებენ, გლობალური ფინანსური და სამართლებრივი სისტემისთვის:

  • "რა თქმა უნდა, რუსეთის ფედერაცია გააპროტესტებს ასეთ გადაწყვეტილებებს, ჩვენ დავიცავთ ჩვენს ინტერესებს, დავიცავთ ჩვენს ქონებას, რომელიც უკანონოდ იქნა ჩამორთმეული", — თქვა პუტინის პრესმდივანმა, დმიტრი პესკოვმა
  • მან, ასევე, აღნიშნა, რომ "დარწმუნებულია, გადაწყვეტილების მიმღებებს ესმით გარდაუვალი შედეგები".

ევროპაში, მართლაც, მიუხედავად კიევის მოწოდებისა, უკრაინის დაფინანსების პრობლემები ამ გზით გადაჭრან, ამ პერსპექტივას უკიდურესი სიფრთხილით ეპყრობიან.

  • კერძოდ, ამ წინადადების წინააღმდეგ გამოდის გერმანია, რომელიც მიიჩნევს, რომ ამგვარ ნაბიჯს მართლაც შეიძლება ჰქონდეს უკიდურესად უარყოფითი შედეგები მთელი ევროპის ფინანსურ სისტემაზე.
  • ამ დროისთვის ევროპულმა ქვეყნებმა იპოვეს შუალედური გამოსავალი — გამოიყენონ პასიური შემოსავალი გაყინული რუსული აქტივებიდან უკრაინის დასახმარებლად, მაგრამ კონფისკაციაზე საუბარი, ჯერჯერობით, არ არის.